ევროპული საქართველოს თავმჯდომარე, გიგა ბოკერია აცხადებს, რომ საქართველოს ეროვნული ინტერესებისთვის დაუშვებელია ოკუპირებულ რეგიონებთან დე ფაქტო საზღვრის დელიმიტაციაზე დისკუსიის დაწყება. ის ოფიციალური მოსკოვის მოწოდებას "მარიონეტული ხელისუფლებების ლეგიტიმაციის" მცდელობად აფასებს და ამბობს, რომ კომპრომისი ამ საკითხზე პრინციპულად დაუშვებელია.

"რუსეთის ფედერაციას პერიოდულად ყოველთვის ჰქონდა ხოლმე მცდელობა, რომ ამ ტიპის მცდელობებით ოკუპაციის და მარიონეტული ხელისუფლებების ლეგიტიმაცია მოეხდინა. რა თქმა უნდა, არც ერთი ფორმით არ არის დასაშვები ჩვენი ეროვნული ინტერესებისთვის ამ ტიპის დისკუსიაში შესვლაც კი.

ჯერ ერთი არავინ არ უნდა მოტყუვდეს, რომ ამის შედეგად რაიმე ნაირად შეაჩერებენ. აგრესიას, პირიქით გაიმტკიცებენ მდგომარეობას დიპლომატიურად და კიდევ უფრო დიდ პრობლემას შეუქმნიან ჩვენს ქვეყანას ფიზიკურად და ამასთან ერთად პოლიტიკურად. პრინციპულად დაუშვებელია კომპრომისი და მარიონეტული ხელისუფლების რაიმე სახით ჩართვა ე.წ დელიმიტაციაში საოკუპაციო ხაზის", — განაცხადა გიგა ბოკერიამ.

ჟენევის საერთაშორისო მოლაპარაკებების 54-ე რაუნდის შემდეგ, რუსეთმა თბილისს მის მიერ ოკუპირებულ აფხაზეთთან და ცხინვალთან ე.წ. საზღვრის დელიმიტაცია-დემარკაციისკენ მოუწოდა. კრემლი ამას რეგიონში უსაფრთხოების გაძლიერების მიზნით ხსნის.

გაიგე მეტი: