აშშ-ის თავდაცვის მდივანი, ლოიდ ოსტინი ოფიციალური ვიზიტით საქართველოს ეწვევა. საქართველოს თავდაცვის სამინისტრო ამ ვიზიტს ისტორიულს უწოდებს. პენტაგონმა გუშინ, 12 ოქტომბერს გაავრცელა ინფორმაცია, რომ ლოიდ ოსტინი საქართველოს გარდა, ეწვევა უკრაინასა და რუმინეთს, ასევე ჩავა ბრიუსელში, NATO-ს თავდაცვის მინისტერიალზე.

"აღნიშნული ვიზიტი კიდევ ერთხელ ხაზს უსვამს აშშ-სა და საქართველოს შორის არსებული სტრატეგიული პარტნიორობის სიმტკიცესა და თანამშრომლობის მაღალ დონეს, საერთო ღირებულებებზე დამყარებული პარტნიორობის განსამტკიცებლად, — წერია თავდაცვის სამინისტროს განცხადებაში.

საქართველოს თავდაცვის სამინისტროს ინფორმაციით, თანამდებობაზე დანიშვნის შემდეგ, ლოიდ ოსტინს ერთ-ერთი პირველი სატელეფონო საუბარი საქართველოს თავდაცვის მინისტრ ჯუანშერ ბურჭულაძესთან ჰქონდა, სადაც ხაზი გაესვა საქართველოსთან თანამშრომლობის მნიშვნელობას. უწყება ამბობს, რომ აშშ-ის თავდაცვის მდივნის ვიზიტი კიდევ უფრო გააძლიერებს ქვეყნების მჭიდრო თანამშრომლობას თავდაცვის სფეროში და ხელს შეუწყობს სტრატეგიული პარტნიორობის კიდევ უფრო განმტკიცებას.