ფლორიდის საერთაშორისო უნივერსიტეტის მკვლევარი დევიდ კრამერი აცხადებს, რომ ბრალდებები ექსპრეზიდენტის, მიხეილ სააკაშვილის წინააღმდეგ პოლიტიკურად მოტივირებულად მიაჩნია. მისი თქმით, სააკაშვილის საქართველოში დაბრუნება პროვოკაცია, ხოლო დაკავება კონტრპროვოკაცია იყო.

ფორმულას ეთერში კრამერი ამბობს, რომ სააკაშვილი უნდა გაათავისუფლონ და დაბრუნდეს უკრაინაში.

"ბრალდებები მის წინააღმდეგ პოლიტიკურად მოტივირებულად მეჩვენება. ვფიქრობ, რომ კომენტარები სამთავრობო, ოფიციალური პირების და ოცნების მხრიდან, ხაზს უსვამს ამ სიტუაციის პოლიტიკურ ხასიათს. ანუ, მასზე მუქარა ხანგრძლივი პატიმრობის ვადაზე, ხაზს უსვამს პოლიტიკურ ბუნებას.

ამ სიტუაციაში საუკეთესო გამოსავალი მისი გათავისუფლება იქნება და უფლების მიცემა, დაბრუნდეს უკრაინაში. იგი აღარ არის საქართველოს მოქალაქე, გახლავთ უკრაინის მოქალაქე და ვფიქრობ, ეს საუკეთესო გამოსავალი იქნება", — ამბობს კრამერი. [ფორმულას თარგმანი]

ჟურნალისტმა კრამერს ჰკითხა, რა სიგნალია საერთაშორისო პარტნიორებისთვის ღარიბაშვილის განცხადება, რომ სააკაშვილს 6 წელი მაინც მოუწევს ციხეში ყოფნა და უკრაინას არ გადასცემენ. პასუხად კრამერი ამბობს, რომ პრემიერმინისტრი არ უნდა აკეთებდეს კომენტარს სამართლებრივ საკითხზე.

27 სექტემბერს ექსპრეზიდენტმა სააკაშვილმა ფეისბუქზე გამოაქვეყნა ბილეთების ფოტო, რომლის მიხედვითაც ქვეყანაში 2 ოქტომბერს, ხმის მიცემის პროცედურის დასრულების შემდეგ უნდა დაბრუნებულიყო. მმართველ გუნდში ამბობდნენ, რომ ის სიტყვას ისევ უღალატებდა და ჩამოსვლას ვერ გაბედავდა, მაგრამ თუ მაინც გაბედავდა, აეროპორტშივე დააკავებდნენ. თუმცა, არჩევნების წინა დღეს, პირველ ოქტომბერს, სააკაშვილმა დაპოსტა, რომ საქართველოში იმყოფებოდა. რამდენიმე საათში მან ორი ვიდეოც გაავრცელა, რომელშიც ამბობდა, რომ ბათუმშია და აქტიურად აპირებს ბრძოლას.

სანამ სააკაშვილი მხარდამჭერებს მობილიზაციისკენ მოუწოდებდა, ქართულ ოცნებაში ამტკიცებდნენ, რომ ის არათუ ქვეყანაში შემოვიდა, უკრაინაში იყო. იმავეს ამბობდა შინაგან საქმეთა სამინისტროც და ამტკიცებდა, რომ მას არც უკრაინის და არც საქართველოს საზღვრები არ გადაუკვეთავს. ამ განცხადებებიდან რამდენიმე საათში პრემიერმინისტრმა, ირაკლი ღარიბაშვილმა შინაგან საქმეთა მინისტრთან და სახელმწიფო უსაფრთხოების სამსახურის ხელმძღვანელთან ერთად ბრიფინგი გამართა, სადაც თქვა, რომ სააკაშვილი დაკავებულია და პენიტენციურ დაწესებულებაში გადაიყვანეს. მოგვიანებით, იმედის ეთერში პრემიერმინისტრი ამტკიცებდა, რომ ყველაფერი წინასწარ იცოდნენ და "ოპერატიული ტაქტიკის" გამო უწევდათ საპირისპირო განცხადებების გაკეთება.

გაიგე მეტი:

• მიხეილ სააკაშვილის მიერ საზღვრის უკანონო კვეთის საქმეზე გამოძიება დაიწყო
• სალომე ზურაბიშვილი მიხეილ სააკაშვილის შეწყალებას არ აპირებს
• სააკაშვილი შიმშილობას იწყებს
• უკრაინის საგარეო საქმეთა სამინისტრო სააკაშვილის დაკავებაზე განმარტებებს ითხოვს
• ელჩი არ არის დაბარებული, შეხვედრას გამართავს საელჩოს დიპლომატი — საგარეო სააკაშვილზე