შინაგან საქმეთა მინისტრი, ვახტანგ გომელაური ამბობს, რომ მშენებლობის ნებართვის გაცემაზე მეტი ყურადღებაა მისაქცევი. ჟურნალისტმა მას უთხრა, რომ პრემიერმინისტრმა, ირაკლი ღარიბაშვილმა ახალი ნებართვების გაცემის გამკაცრებაზე ისაუბრა და ჰკითხა, რას ფიქრობს თავად უკვე არსებულ უკანონო მშენებლობებზე, რაზეც გომელაურმა ასე უპასუხა:

"პრემიერმა თუ თქვა გამკაცრდება, გამკაცრდება ნამდვილად. იქნება, ალბათ, მეტი ყურადღება მისაქცევი. ხაზს ვუსვამ, ძალიან ბევრი პრობლემაა. თბილისში, მით უმეტეს. ნუ, თბილისი დიდია ყველაზე, დედაქალაქია. ის როგორ უნდა გაუმკლავდეს ამას, მე არ ვიცი. ურთულესი თემაა ნამდვილად. ასობით და ათასობით ოჯახია [...] მე ვერ გეტყვით მაგაზე, ალბათ, მერიას ან ინფრასტრუქტურას [უნდა ჰკითხოთ]", — განაცხადა ვახტანგ გომელაურმა.

ირაკლი ღარიბაშვილმა განაცხადა, რომ მთავრობა გეგმავს მშენებლობის ნებართვების გამკაცრებას.

"რა თქმა უნდა, ჩვენ ვგეგმავთ, რომ კიდევ უფრო მეტად გავამკაცროთ რეგულაციები, საერთოდ ნებართვის გაცემის პროცედურებიც უნდა გაკონტროლდეს მკაცრად და ასეთი შეცდომა მეორედ აღარ უნდა განმეორდეს", — განაცხადა ირაკლი ღარიბაშვილმა.

8 ოქტომბერს, ბათუმში, 26 მაისის ქუჩაზე საცხოვრებელი კორპუსი ჩამოინგრა. სამაშველო ღონისძიება თითქმის 30 საათის განმავლობაში მიმდინარეობდა. დაღუპულია 9 ადამიანი, გადარჩა ერთი. გარდაცვლილებს შორის 3 არასრულწლოვანია.

9 ოქტომბერს კორპუსის ჩამონგრევის საქმეზე სამი ადამიანი დააკავეს. ერთ-ერთი ზაურ ბუდატოვია, რომელიც პირველ სართულზე მდებარე ბინის მესაკუთრეა. დანარჩენი ორი კი მის მიერ დაქირავებული მშენებლები. პროკურატურა აცხადებს, რომ ბრალდებულებმა მოშალეს მზიდი და არამზიდი კედლები, რითაც დაირღვა საცხოვრებელი კორპუსის სიმტკიცე და მდგრადობა და ნგრევა გამოიწვია. 11 ოქტომბერს კორპუსის ჩამონგრევის საქმეზე ბრალდებულ 3 ადამიანს აღკვეთი ღონისძიების სახით სასამართლომ პატიმრობა შეუფარდა.

ბათუმში მომხდარი ტრაგედიის გამო, 11 ოქტომბერი გლოვის დღედ გამოცხადდა. მთავრობის განკარგულებით, ორშაბათს 00:00 საათიდან, 12 ოქტომბრის 00:00 საათამდე, საქართველოს მთელს ტერიტორიაზე, ასევე საზღვარგარეთ საქართველოს დიპლომატიური წარმომადგენლობების და საკონსულო დაწესებულებების შენობებზე სახელმწიფო დროშები დაეშვა.