საკოორდინაციო საბჭოს გადაწყვეტილებით, შეზღუდვების ნაწილი შემსუბუქდა. ამის მიზეზად "ქვეყანაში არსებული ეპიდემიოლოგიური ტენდენციები" სახელდება. კერძოდ, საბჭოს გადაწყვეტილებით:

  • კვების ობიექტების მუშაობა ხვალიდან, 6 ოქტომბრიდან 1 საათით გახანგრძლივდება და ისინი 22:00 საათის ნაცვლად, მუშაობას 23:00 საათამდე შეძლებენ;
  • იხსენება კონცერტებისა და ფესტივალების გამართვასთან დაკავშირებული შეზღუდვა და მათი ჩატარება შესაძლებელი იქნება არსებული რეგულაციების დაცვით;
  • კვლავ ძალაში რჩება შეზღუდვა, რომლის თანახმად, სპორტული ღონისძიებები მაყურებლის გარეშე უნდა ჩატარდეს.

თუმცა დაწესდა გამონაკლისიც — 9 ოქტომბერს დაგეგმილ საქართველო-საბერძნეთის საფეხბურთო მატჩზე მაყურებლის 33% დაიშვება, თუმცა იმ პირობით, რომ ისინი წარმოადგენენ ვაქცინაციის დამადასტურებელ დოკუმენტს, 72-საათიანი ვალიდურობის PCR ტესტის უარყოფით პასუხს, 24-საათიანი ვალიდურობის ანტიგენის ტესტის უარყოფით პასუხს ან ბოლო 6 თვის განმავლობაში კორონავირუსის გადატანის ცნობას.

გარდა ამისა, პირბადის ტარება კვლავ სავალდებულოა როგორც ღია, ისე დახურულ სივრცეებში.

ძალაში რჩება შეზღუდვა ფართომასშტაბიანი გასართობი და ისეთი სოციალური ღონისძიებების გამართვასთან დაკავშირებით, როგორიცაა, ქორწილი, ქელეხი, ბანკეტი, სხვადასხვა სახის იუბილე და სხვა. მსგავსი ღონისძიებების მასპინძლობისთვის კვების ობიექტებს თუ სარიტუალო დარბაზებს პირველ ჯერზე დაეკისრებათ ფინანსური სანქცია 10 ათასი ლარის ოდენობით, ხოლო მსგავსი ქმედების განმეორებით განხორციელების შემთხვევაში, ობიექტები დაილუქება.

საკოორდინაციო საბჭოსთან არსებული ოპერაციული შტაბის ხელმძღვანელმა დღეს ასევე თქვა, რომ კვლავ გაგრძელდება დადგენილი რეგულაციების აღსრულების მკაცრი კონტროლი. საბჭო მოუწოდებს მოქალაქეებს, დაიცვან რეგულაციები: ატარონ პირბადე როგორც დახურულ, ისე ღია სივრცეში, დაიცვან სოციალური დისტანცია და აიცრან.

ამასთან, გიორგი ღიბრაძემ თქვა ისიც, რომ აცრების ინტენსივობის გაზრდისა და ვაქცინაციაზე ხელმისაწვდომობის უზრუნველყოფის მიზნით, მობილური ბრიგადები გაიგზავნება სხვადასხვა რეგიონის სხვადასხვა დასახლებულ პუნქტში, რაცა აცრის მსურველ მოქალაქეებს სერვისი ადგილზე მიეწოდოს.