"დღევანდელ გამოწვევაზეც ჩემი და ჩემი კოლეგების, პირველ რიგში, ჟურნალისტების პასუხი ქართული ოცნების მთავრობისადმი არის ის, რომ ჩვენ თქვენი არ გვეშინია", — განაცხადა ტელეკომპანია ფორმულას ჟურნალისტმა, გიორგი თარგამაძემ. ასე ეხმაურება ის ინფორმაციას, რომ თავდაცვის სამინისტრომ თავდაცვის ყოფილი მინისტრისა და ტელეკომპანია ფორმულას დამფუძნებლის, დავით კეზერაშვილის წინააღმდეგ სარჩელი შეიტანა.

"სასწორზე დევს გაცილებით უფრო მნიშვნელოვანი რამ თითოეული ჩვენგანისთვის, განსაკუთრებით, ამ თაობის ჟურნალისტებისთვის, რომლებმაც ბევრი რამ გამოვიარეთ, ბევრი რამ გადავიტანეთ, რომ გადავარჩინოთ საქართველოში სიტყვის თავისუფლება და შევუნარჩუნოთ შანსი საქართველოს განვითარდეს, როგორც დემოკრატიული და ევროპული სახელმწიფო. ეს არის გზავნილი, ცხადია, აქ მომუშავე ჟურნალისტების დასაშინებლადაც, მაგრამ პირველ რიგში ეს არის მორიგი გზავნილი ამ არხის დამფუძნებლისადმი, რომ მან ხელი აიღოს საქართველოში კრიტიკული მედიის მხარდაჭერასა და დაფინანსებაზე", — აღნიშნა მან.

საქართველოს თავდაცვის სამინისტრომ ყოფილი თავდაცვის მინისტრის, დავით კეზერაშვილისა და მისი თანამდებობაზე ყოფნის დროს სახელმწიფო შესყიდვების დეპარტამენტის უფროსის, ალექსანდრე ნინუას წინააღმდეგ საქალაქო სასამართლოში სარჩელი შეიტანა. სამინისტროს განცხადებით, ისინი თავდაცვის უწყების მიმართ "დანაშაულებრივი ქმედებით მიყენებული ზიანის" ანაზღაურებას ითხოვენ.

7 სექტემბერს უზენაესმა სასამართლომ ყოფილ მაღალჩინოსანსა და ტელეკომპანია ფორმულას დამფუძნებელს, დავით კეზერაშვილს 5-წლიანი პატიმრობა მიუსაჯა. ადვოკატის ინფორმაციით, თავდაცვის ყოფილ მინისტრის, დავით კეზერაშვილს პროკურატურა საწვრთნელ პროექტში 5 მილიონზე მეტი თანხის გაფლანგვას ედავებოდა, თუმცა, მას ბრალი ვერ დაუმტკიცდა ვერც საქალაქო და ვერც სააპელაციო სასამართლოში.

გაიგე მეტი: