მთავარი არხის დირექტორი, ნიკა გვარამია აცხადებს, რომ ყოფილი თავდაცვის მინისტრის და ტელეკომპანია ფორმულას მეწილის, დავით კეზერაშვილის მიმართ თავდაცვის სამინისტროს მიერ სასამართლოში შეტანილი სარჩელი მიზნად ისახავს ტელეკომპანია ფორმულაზე ყადაღის დადებას და იმავე სიტუაციის განვითარებას, რაც მოხდა რუსთავი 2-ში.

"სრულიად ნათელი გახდა, რატომ გამოიტანა გამამტყუნებელი განაჩენი სასამართლომ აბსოლუტურად წარმოუდგენელ სამართლებრივ ვითარებაში. ახლა შეტანილი სარჩელი 5 მილიონის ოდენობით, მიზნად ისახავს ზუსტად იმავე სქემის დატრიალებას, რაც მოხდა რუსთავი 2-ში თავის დროზე — ყადაღის დადებას წილებზე, შესაძლოა, დროებითი მმართველი შეშვებას ფორმულაში და ასე შემდეგ.

კარგად იცოდეს ყველამ, რუსთავი 2 ამ ქვეყანაში აღარ განმეორდება, გამორიცხულია. დავიცავთ ამჯერად უკვე ფორმულას ყველა ერთად", — თქვა ნიკა გვარამიამ მთავარი არხის ეთერში.

საქართველოს თავდაცვის სამინისტრომ ყოფილი თავდაცვის მინისტრის, დავით კეზერაშვილისა და მისი თანამდებობაზე ყოფნის დროს სახელმწიფო შესყიდვების დეპარტამენტის უფროსის, ალექსანდრე ნინუას წინააღმდეგ საქალაქო სასამართლოში სარჩელი შეიტანა. სამინისტროს განცხადებით, ისინი თავდაცვის უწყების მიმართ "დანაშაულებრივი ქმედებით მიყენებული ზიანის" ანაზღაურებას ითხოვენ.

7 სექტემბერს უზენაესმა სასამართლომ ყოფილ მაღალჩინოსანსა და ტელეკომპანია ფორმულას დამფუძნებლს, დავით კეზერაშვილს 5-წლიანი პატიმრობა მიუსაჯა. ადვოკატის ინფორმაციით, თავდაცვის ყოფილ მინისტრის, დავით კეზერაშვილს პროკურატურა საწვრთნელ პროექტში 5 მილიონზე მეტი თანხის გაფლანგვას ედავებოდა, თუმცა, მას ბრალი ვერ დაუმტკიცდა ვერც საქალაქო და ვერც სააპელაციო სასამართლოში.