ტელეკომპანია რუსთავი 2-ის გენერალური დირექტორის, ნიკა გვარამიას ცემისთვის ტელეკომპანია მაესტროს ყოფილი დირექტორის შვილს, რატი გაჩეჩილაძეს სასამართლომ ჯარიმა შეუფარდა. თბილისის საქალაქო სასამართლოს გადაწყვეტილებით, გაჩეჩილაძეს 3 100 ლარის გადახდა მოუწევს. სასამართლომ გადაწყვეტილება რამდენიმე წუთის წინ მიიღო.

გაჩეჩილაძე ამ თანხიდან მხოლოდ სამი ათას ლარს გადაიხდის, 100 ლარი კი, პატიმრობაში გატარებული დღეებისთვის ჩამოაკლდა.

"ჩვენ მიგვაჩნდა, რომ აქ არ უნდა ყოფილიყო სისხლის სამართლებრივი დევნა და უნდა ყოფილიყო ადმინისტრაციულად დასჯადი. მიმაჩნია, რომ საკმაოდ მკაცრადაც დაისაჯა ეს ადმიანი, რომელიც წინასწარ პატიმრობაში იმყოფებოდა თითქმის სამი დღის განმავლობაში," - აღნიშნა გაჩეჩილაძის ადვოკატმა, ირმა ჭკადუამ.

7 იანვარს თბილისში, რესტორან დაინინგ რუმში ტელეკომპანია რუსთავის 2-ის გენერალური დირექტორის მიმართ ფიზიკურ და სიტყვიერი შეურაცხყოფას ედავება. გაჩეჩილაძეს ბრალი 8 იანვარს წაუყენეს. აღნიშნულ ფაქტთან დაკავშირებით, შსს-მ გამოძიება საქართველოს სისხლის სამართლის კოდექსის 126-ე მუხლით დაიწყო, რაც "ძალადობას" გულისხმობს. ამ მუხლის მიხედვით, ცემა ან სხვაგვარი ძალადობა, რამაც დაზარალებულის ფიზიკური ტკივილი გამოიწვია, მაგრამ არ მოჰყოლია ჯანმრთელობის განზრახ მსუბუქი დაზიანება ისჯება ჯარიმით ან საზოგადოებისათვის სასარგებლო შრომით ვადით ას ოციდან ას ოთხმოც საათამდე ანდა თავისუფლების აღკვეთით ვადით ერთ წლამდე.