საქართველოს შინაგან საქმეთა სამინისტროს თბილისის პოლიციის დეპარტამენტის დეტექტივების სამმართველოს თანამშრომლებმა რატი გაჩეჩილაძე დააკავეს. გამოძიება მას გუშინ 7 იანვარს თბილისში, რესტორან დაინინგ რუმში ტელეკომპანია რუსთავის 2-ის გენერალური დირექტორის მიმართ ფიზიკურ და სიტყვიერი შეურაცხყოფას ედავება. ამის შესახებ ინფორმაცია შსს-მ 8 იანვარს გაავრცელა.

ტელეკომპანია რუსთავი 2-ის გენერალურმა დირექტორმა, ნიკა გვარამიამ 7 იანვარს გაავრცელა ფეისბუკში განცხადება, რომ მას ფიზიკური შეურაცხყოფა მიაყენეს. აღნიშნულ ფაქტთან დაკავშირებით, შსს-მ გამოძიება საქართველოს სისხლის სამართლის კოდექსის 126-ე მუხლით დაიწყო, რაც "ძალადობას" გულისხმობს. ამ მუხლის მიხედვით, ცემა ან სხვაგვარი ძალადობა, რამაც დაზარალებულის ფიზიკური ტკივილი გამოიწვია, მაგრამ არ მოჰყოლია ჯანმრთელობის განზრახ მსუბუქი დაზიანება ისჯება ჯარიმით ან საზოგადოებისათვის სასარგებლო შრომით ვადით ას ოციდან ას ოთხმოც საათამდე ანდა თავისუფლების აღკვეთით ვადით ერთ წლამდე.

7 იანვარსვე, მოგვიანებით, ნიკა გვარამიას საქმეში ძალადობის ბრალდებით დაკავებულმა რატი გაჩეჩილაძემ ფეისბუკში განცხადება გაავრცელა. ის წერდა, რომ ნიკა გვარამიას ფიზიკური შეურაცხყოფა მან მიაყენა და გეგმავდა საგამოძიებო უწყებაში ადვოკატთან ერთად გამოცხადებას.

რატი გაჩეჩილაძე ტელეკომპანია მაესტროს ყოფილი დირექტორისა და საქართველოს პრეზიდენტობის ყოფილი კანდიდატის ლევან გაჩეჩილაძის შვილია.