აჭარის ავტონომიური რესპუბლიკის თავმჯდომარის, თორნიკე რიჟვაძის თქმით, იმ შემთხვევაში, თუკი საქართველოს ექსპრეზიდეტი მიხეილ სააკაშვილი საქართველოში ჩამოვა, მას პირდაპირ დააკავებენ. რიჟვაძის აზრით, ექსპრეზიდენტის საქართველოში დაბრუნების შანსი ძალიან დაბალია, რადგან მას ამის გამბედაობა არ ეყოფა.

"თუ რაღაცა მოხდება და გაბედავს, ძალიან გაუჭირდება ქართულ მიწაზე გავლა, გადაინაცვლებს პირდაპირ ციხეში, პენიტენციურ დაწესებულებაში, სადაც მას დახვდება მისი მმართველობისგან განსხვავებული, ევროპული სტანდარტის პენიტენციური დაწესებულება", — ამბობს ის.

რიჟვაძე სააკაშვილის განცხადებებს არასერიოზულს უწოდებს და ირწმუნება, რომ სააკაშვილს არც ბილეთი შეუძენია და არც რიგში დგას.

"არასერიოზულია მისი განცხადებები, ზოგადად გაკოტრებული პოლიტიკოსი, მსჯავრდებული პრეზიდენტი, ყოველი არჩევნების წინ აჩენს გარკვეულ ყალბ მოლოდინებს, 4 დღე არის დარჩენილი, დარწმუნებული ვარ, ბილეთი არ შეუძენია და არც რიგში დგას, თუ გადაამოწმებთ, ყველაფერი იქნება ძალიან კარგად, ისე როგორც ამ ქვეყანას სჭირდება", — აღნიშნავს რიჟვაძე.


27 სექტემბერს ექსპრეზიდენტმა, მიხეილ სააკაშვილმა თვითმფრინავის ბილეთი გამოაქვეყნა, რომლის მიხედვითაც 2 ოქტომბერს ჩამოფრინდება. ბილეთის მიხედვით, ის საქართვლოში დედასთან, გიული ალასანიასთან ერთად ჩამოვა.

6 სექტემბერს სააკაშვილმა საკუთარი გეგმების შესახებ ისაუბრა და საქართველოში ჩამოსვლა კვლავ დააანონსა. ეს პირველი შემთხვევა არ ყოფილა, როდესაც სააკაშვილი საქართველოში დაბრუნებაზე საუბრობდა. იმავეს ამბობდა ის წინა არჩევნების პერიოდშიც და ეს რამდენჯერმე თქვა ახლაც. მისი თქმით, პირობას შეასრულებდა და "რეფერენდუმის" წინ საქართველოში ჩამოვიდოდა. სააკაშვილის ჩამოსვლასთან დაკავშირებით განცხადებებზე საუბრისას მმართველ პარტიას არაერთხელ უთქვამს, რომ მას ქვეყანაში შემოსვლის შემთხვევაში დააკავებენ. მიხეილ სააკაშვილის მიმართ არაერთი გამამტყუნებელი განაჩენი არსებობს საქართველოში.

საქართველოში თვითმმართველობის არჩევნები 2 ოქტომბერს იქნება. მას ოპოზიცია რეფერენდუმს უწოდებს და აცხადებს, რომ თუ ქართული ოცნება 43%-ს ვერ აიღებს, რიგგარეშე არჩევნები ჩატარდება. აღნიშნულს არ ეთანხმება მმართველი პარტია, რომელიც 28 ივლისს შეთანხმებიდან გავიდა და დოკუმენტი ანულირებულად გამოაცხადა. პარტიის თავმჯდომარემ, ირაკლი კობახიძემ ეს ოპოზიციას დააბრალა და თქვა, რომ შეთანხმებას მხოლოდ ისინი ასრულებდნენ, რაც არასწორია, ამიტომ დოკუმენტმა თავი ამოწურა.

მიშელის შეთანხმების ერთ-ერთი მთავარი ჩანაწერი კი სწორედ 43%-იანი ბარიერი იყო, რაც იმას ნიშნავდა, რომ თუ ქართულ ოცნებას თვითმმართველობის არჩევნებზე ამაზე ნაკლები შედეგი ექნებოდა, რიგგარეშე არჩევნები უნდა ჩატარებულიყო. ახლა ეს დათქმა აღარ არსებობს.