13 სექტემბერს გავრცელებული ჩანაწერებიდან ჩანს, რომ სახელმწიფო უსაფრთხოების სამსახური ილია მეორესაც უსმენდა. ფაილების მიხედვით, 2019 წლის 25 სექტემბერს, მცხეთის ჯვრის მონასტერთან არსებული საპატრიარქო რეზიდენციიდან ილია მეორე დაუკავშირდა თავის დას, მონაზონ ნატალია შიოლაშვილს, რომელსაც აცნობა, რომ ცუდი სიზმარი ნახა და ხსენებულიდან გამომდინარე, დაავალა საპატრიარქოში არსებული მისი პირადი სეიფი სასწრაფოდ შეამოწმოს.

"მოგვიანებით, შიოლაშვილმა უწმინდესს განუცხადა, რომ სეიფს რაიმე სახის დაზიანება არ აღენიშნება.
შენიშვნა: საეკლესიო კანონიკის მიხედვით, პატრიარქები პირად სეიფში ინახავენ ანდერძს, რომელიც იხსნება მათი გარდაცვალების შემდგომ", — წერია ჩანაწერებში.

ფაილებიდან, ასევე, ვიგებთ, რომ 20 ნოემბერს, პატრიარქი ვანო კობაიძის ტელეფონით დაუკავშირდა დას, მონაზონ ნატალია შიოლაშვილს და მისი ადგილმდებარეობით დაინტერესდა. შიოლაშვილის თქმით, მან გადმოკვეთა რუსეთის საბაჟო ტერმინალი და მცირე ხანში შემოვა საქართველოში. ჩანაწერის ავტორი იქვე მიუთითებს, რომ ნატალია შიოლაშვილმა იმ დღეს ყაზბეგის გავლით დატოვა სახელმწიფოს ტერიტორია.

"ამავე საუბარში უწმინდესი დაინტერესდა — გააკეთე საქმე?, რაზეც შიოლაშვილმა უპასუხა — "სულ, სულ ყველაფერი გავაკეთე და მომაქვს ყველაფერი", — ვკითხულობთ ჩანაწერებში.

ფაილებში, ასევე, მოცემულია შემდეგი დიალოგი:

[20.11.19, 19:31:21] ესაც და ამის წინა საუბარიც შეინახეთ
[20.11.19, 19:31:37] ოკ
[20.11.19, 19:31:38] რაზე იყო საინტერესოა,
[20.11.19, 19:33:12] ძველ სახლში ალბათ, ვლადიკავკაზში
[20.11.19, 19:33:41] ხო მარა რატო მალავენ, რაღაც მოაქ იქედან
[20.11.19, 19:33:55] ხოო, რას გაიგებ

გარდა ამისა, ფაილებში არის პატრიარქის დაცვის უფროსის, ვანო კობაიძის ტელეფონით პატრიარქის საუბარი წმინდა ილია მართლის სახელობის ტაძრის წინამძღვართან, ტარიელ სიკინჭალაშვილთან. დოკუმენტის მიხედვით, ილია მეორემ მას აცნობა, რომ საპატრიარქოს საკუთრებაში გადაეცა სახლი ორჯონიკიძეში, სადაც დაიბადა თავად და სურს ხსენებული სახლის გარემონტება და სასტუმროს ტიპის სახლად გადაკეთება. აქვე მითითებულია, რომ სასტუმროთი ისარგებლებენ ქართველი ტურისტები, ასევე მოეწყობა გამოფენები და სხვა კულტურული ღონისძიებები. ჩანაწერს ბოლოს აქვს ავტორის შენიშვნა, რომ შესაძლოა, სწორედ ხსენებული სახლის სანახავად წასულიყო 20 ნოემბერს ილია მეორეს და, ნატალია შიოლაშვილი ჩრდილოეთ ოსეთში.


13 სექტემბერს ცნობილი გახდა, რომ ერთ-ერთი ღია წყაროზე სასულიერო პირებთან დაკავშირებით მასალები აიტვირთა. უცნობია, ვინ გაავრცელა ფაილები და ასევე, არ არის დადასტურებული მათი ავთენტურობა. თუმცა რამდენიმე პოლიტიკოსმა და ჟურნალისტმა, მათ შორის On.ge-ს ყოფილმა რედაქტორმა განაცხადეს, რომ ჩანაწერებში საკუთარი საუბრები ამოიცნეს.

ჩანაწერების მიხედვით, უსმენენ და უთვალთვალებენ ელჩებსა და საელჩოების თანამშრომლებსაც. ფაილებში დაარქივებულია ევროკავშირის ელჩისა და მისი თანამშრომლის საუბარი. თავდაპირველად, ელჩი თანამშრომელს პროტოპრესვიტერ გიორგი ზვიადაძის ნომერს სთხოვს, შემდეგ კი მიმდინარე საკითხებზე თავის პოზიციას აფიქსირებს.

დოკუმენტებში არის ინფორმაცია ამერიკის საელჩოს წარმომადგენლების შესახებაც. მაგალითად, მითითებულია, რომ ელჩის თანაშემწეს დაუკავშირდა USAID-ის წარმომადგენელი და კონკრეტული შეხვედრის მონაწილეების შესახებ ინფორმაცია დააზუსტა.

მსგავსი ინფორმაციები გვხვდება გერმანიის, საფრანგეთის, ისრაელის და სხვა საელჩოების შემთხვევაშიც.

გაიგეთ მეტი გავრცელებულ ჩანაწერებზე: