სოციალური სამართლიანობის ცენტრის განცხადებით, აფხაზეთის დე ფაქტო ხელისუფლების მიერ გალის რაიონში არსებულ სკოლებში ქართული ენაზე სწავლების სრულად აკრძალვა ეთნიკური ქართველების მიმართ მორიგი დისკრიმინაციული გადაწყვეტილებაა და ასიმილაციური კულტურული პოლიტიკის გაგრძელებას წარმოადგენს.

მათივე თქმით, არსებითია საქართველოს ხელისუფლებამ გამოიყენოს ყველა დიპლომატიური, პოლიტიკური და სამართლებრივი მექანიზმი ეთნიკური ქართველებისთვის მშობლიურ ენაზე განათლების მიღების უფლების დასაცავად და მათ შორის, გამართოს აქტიური მოლაპარაკებები დე ფაქტო მთავრობასთან.

ამასთანავე, ორგანიზაცია აცხადებს, რომ მნიშვნელოვანია საქართველოს მთავრობამ შეიმუშავოს ქართული ენისა და სხვა საგნების სწავლების ალტერნატიული ფორმატები და პროგრამების გალში მცხოვრები ახალგაზრდებისთვის, ამ მიზნით მათ შორის, მოახდინოს საგანმანათლებლო, ტექნიკური და საბიბლიოთეკო რესურსების მობილიზება.

"სამწუხაროა, რომ საქართველოს ხელისუფლებამ მცდელობების მიუხედავად წლების განმავლობაში ვერ მოხერხდა მიმდინარე კულტურული ასიმილაციის პროცესის შეკავება და მისგან მომდინარე რისკების დაზღვევა თუნდაც ალტერნატიული მდგრადი და ეფექტიანი საგანმანათლებლო რესურსების შექმნით ადგილზე. მნიშვნელოვანია, რომ საქართველოს ხელისუფლება დღემდე ეხმარება გალის რაიონის სკოლებს, რაც მასწავლებლებისთვის საგანმანათლებლო კურსების, ფინანსური დახმარების გაწევასა და სახელმძღვანელოებით მომარაგებაში გამოიხატება", — აცხადებს სოციალური სამართლიანობის ცენტრი.

გალის რაიონის სკოლებში მე-11 კლასის ჩათვლით მოსწავლეებს ქართულ ენაზე განათლების მიღება აეკრძალათ.

ოკუპირებულ აფხაზეთში ქართულენოვანი სკოლების შემცირება 1992-93 წლებში ომის შემდეგ, 1994 წლიდან დაიწყო. თუ, მაგალითად, ომამდე პერიოდში 50-ზე მეტი ქართული სკოლა იყო, 2015 წელს ეს რიცხვი 11-მდე შემცირდა. ეს ის პერიოდია, როცა აფხაზეთის დე ფაქტო მთავრობამ სკოლების ნელ-ნელა სრულად რუსულ სწავლებაზე გადასვლისკენ განაცხადა.

2015 წელს, ეს ცვლილება ძირითადად დაწყებით კლასებს შეეხო. გეგმის მიხედვით, ყოველ მომდევნო წელს კიდევ ერთი კლასი ემატებოდა, რომელსაც რუსულად უნდა ესწავლა. რამდენიმე წელიწადში კი სკოლაში უკვე არც-ერთი კლასი აღარ უნდა არსებულიყო, სადაც ეთნიკურად ქართველი მოსწავლეები ქართულად ისწავლიდნენ.