ქართული ოცნების დეპუტატიs, გია ვოლსკის თქმით, არ არის გამორციხული, რომ ფარული ჩანაწერების გამოქვეყნება ექსპრემიერ გიორგი გახარიასა და ერთიანი ნაციონალური მოძრაობის თანამშრომლობის შედეგი იყოს.

"როდესაც პრემიერმინისტრი ისეთ ნაბიჯს დგამს იმ მონენტში, როდესაც დაანონსებულია ნაცების და აი, ამ სატელიტების მიერ სახელმწიფო სტრუქტურების ჩამოშლა, სამაჯურს იხსნის და ამ სამაჯურს შენ წონას აძლევ და აი, ამ დაანონსებას მხარს უჭერ იმით, რომ გადადექი, მე არავითარი საფუძველი არ მაქვს გამოვრიცხო ის, რომ ყველაფერი რაც შეიძლება ხდებოდეს, შეიძლება, ნუ ვიტყვით ასე გადაწყვეტილად, ზუსტადაც არის თანამშრომლობის შედეგი", — განაცხადა ვოლსკიმ პალიტრანიუსის ეთერში.

13 სექტემბერს ცნობილი გახდა, რომ ერთ-ერთი ღია წყაროზე სასულიერო პირებთან დაკავშირებით მასალები აიტვირთა. უცნობია, ვინ გაავრცელა ფაილები და ასევე, არ არის დადასტურებული მათი ავთენტურობა. თუმცა რამდენიმე პოლიტიკოსმა და ჟურნალისტმა, მათ შორის On.ge-ს ყოფილმა რედაქტორმა განაცხადეს, რომ ჩანაწერებში საკუთარი საუბრები ამოიცნეს.

ატვირთულია Word-ის ასობით ფაილი და იმ შემთხვევაში, თუ ისინი ავთენტურია, ჩანს, რომ შესაბამისი სამსახურები სწავლობენ სასულიერო პირების საჯარო და პირად კავშირებს, უსმენენ სატელეფონო საუბრებს და აგროვებენ კომპრომატებს პირადი ცხოვრების შესახებაც, მათ შორის, საუბარია ჰომოსექსუალურ კავშირებზე. ფაილებს შორის არის ინფორმაცია რუსული კონტაქტების, ასევე, კონკრეტული პოლიტიკური პარტიების მიმართ დამოკიდებულების შესახებ.

ჩანაწერების გამოქვეყნებიდან მეორე დღეს, სახელმწიფო უსაფრთხოების სამსახურმა განცხადება გაავრცელა, სადაც აღნიშნავს, რომ მსგავსი ინფორმაციის ტირაჟირება შეურაცხყოფს ცალკეული ადამიანების, უსაფრთხოების ოფიცრებისა და მთლიანად სამსახურის პატივსა და ღირსებას. უწყებამ მოუწოდა მედიასა და პოლიტიკურად დაინტერესებულ პირებს, გამოძიების დასრულებამდე თავი შეიკავონ არაზუსტი და გადაუმოწმებელი ინფორმაციის გავრცელებისგან.

გაიგეთ მეტი: