სამოქალაქო საარჩევნო კომისიის განცხადებით, 25 მუნიციპალიტეტში 1930 წლამდე დაბადებული 1311 გარდაცვლილი პირიდან 683 საარჩევნო სიაში ფიქსირდება.

მათი განცხადებით, მუნიციპალიტეტებმა1930 წლამდე დაბადებული 3900 მოქალაქის შესახებ მიაწოდეს ინფორმაცია, რომელთაგან 1311 პირი 12 აპრილის მდგომარეობით გარდაცვლილია.

"გამოვითხოვეთ მუნიციპალიტეტებიდან ინფორმაცია. 1930 წლამდე დაბადებული ადამიანების შესახებ და მუნიციპალიტეტებმა დაგვიდასტურეს 1311 გარდაცვლილის შესახებ, რომლებიც გადავამოწმეთ ერთიან საარჩევნო სიაში. 1311 გარდაცვლილიდან საარჩევნო სიაში ფიქსირდება, რეგისტრირებულია დღეის მდგომარეობით, 683 ადამიანი, ანუ დაახლოებით 52%, ნახევარზე მეტი გარდაცვლილთაგან ფიქსირდება დღესაც საარჩევნო სიაში და არჩევნების დღეს მათი ხმა შესაძლოა გამოყენებული იყოს ხელისუფლების სასარგებლოდ, რაც ზოგადად, გავრცელებული პრაქტიკაა, განსაკუთრებით ისეთ მუნიციპალიტეტებში, სადაც ეთნიკური უმცირესობები ცხოვრობენ, ასეთ მუნიციპალიტეტებში, როგორც ვიცით, უფრო რთულად მიმდინარეობს საარჩევნო პროცესი", — ამბობს გიორგი მჟავანაძე.

კომისიაში ამბობენ, რომ მასშტაბი გაცილებით დიდია, რადგან მათ აღნიშნულზე ინფორმაცია მხოლოდ 25 საშუალო და პატარა ზომის მუნიციპალიტეტისგან მიიღეს.

"ამ ფონზე, საგანგაშოა ის ფაქტი, რომ ამ პრობლემის მასშტაბი გაცილებით დიდია, რადგან ჩვენ ინფორმაცია მივიღეთ მხოლოდ 25 საშუალო და პატარა ზომის მუნიციპალიტეტისგან, 1930 წლამდე დაბადებული და დღეის მდგომარეობით გარდაცვლილი პირების შესახებ. საქართველოში კი სულ 73 მუნიციპალიტეტია. წარმოიდგინეთ რა მასშტაბს მიაღწევს გარდაცვლილი მოქალაქეების რაოდენობა ამომრჩეველთა სიაში თუ გადამოწმდება 73-ვე მუნიციპალიტეტში ინფორმაცია იმ გარდაცვლილი პირების შესახებ, რომლებიც 1930 წლის შემდეგ დაიბადნენ", — ამბობენ ისინი.

სამოქალაქო საარჩევნო კომისიის განცხადებით, ასეთი საგანგაშო მაჩვენებელი მიუთითებს არჩევნების პოტენციური გაყალბების მასშტაბზე და მოუწოდებენ საარჩევნო კომისიას, დროულად იმოქმედოს საარჩევნო სიების შესასწორებლად და არჩევნებში ჩართულ ყველა აქტორს, დაინტერესდნენ ამ საკითხით.