დღეიდან მუნიციპალურმა ტრანსპორტმა მუშაობა განაახლა. საზოგადოებრივი ტრანსპორტის მოძრაობა 14 აგვისტოს შეიზღუდა. თავდაპირველად მას 4 სექტემბრამდე უნდა ემოქმედა, თუმცა საკოორდინაციო საბჭომ რეგულაცია 13 სექტემბრამდე გაახანგრძლივა.

12 სექტემბერს დაავადებათა კონტროლის ეროვნული ცენტრის ხელმძღვანელმა, ამირან გამყრელიძემ მგზავრებს ტრანსპორტში დისტანციის დაცვისკენ მოუწოდა და განაცხადა, რომ ეს მომავალი კვირების განმავლობაში ეპიდსიტუაციის გაუმჯობესების მხრივ მნიშვნელოვანი ფაქტორი იქნება.

აღსანიშნავია, რომ აქამდე მოქმედი ყველა სხვა შეზღუდვა ძალაში რჩება. კერძოდ:

  • სასწავლო პროცესი სკოლებში 15 სექტემბრიდან 4 ოქტომბრამდე დისტანციურ რეჟიმში განახლდება. ანალოგიური რეგულაცია გავრცელდება უმაღლეს და პროფესიულ სასწავლებლებზე;
  • 4 ოქტომბრამდე შეზღუდული დარჩება სააღმზრდელო დაწესებულებების მუშაობა და ეს ეხება, როგორც სახელმწიფო, ასევე, კერძო ბაღებს;
  • კვების ობიექტების მუშაობა დასაშვები იქნება 22:00 საათამდე;
  • სპორტულ ღონისძიებები მაყურებლის გარეშე ჩატარდება.

რაც შეეხება სპორტულ შეჯიბრებებს, გარდა იმისა, რომ ძალაში რჩება მაყურებლის გარეშე ჩატარება, მოთხოვნებს დაემატა მონაწილეებისთვის სავალდებულო ტესტირება ან აცრა. კერძოდ, ყველა მონაწილე უნდა იყოს ან აცრილი, ან უნდა ჰქონდეს 72-საათიანი PCR ტესტი ან 24 საათის მანძილზე მოქმედი ანტიგენის ტესტი.

ამასთან, უკვე დღეიდან ვაქცინაციის წამახალისებელი ლატარია იწყება და მასში მონაწილეობა შეეძლება ყველას, ვინც ერთჯერადად მაინც არის აცრილი. უწყებათაშორის საკოორდინაციო საბჭოსთან არსებული ოპერაციული შტაბის უფროსმა, გიორგი ღიბრაძემ განმარტა, რომ ლატარიის კომპანია 100 და 500 ლარის ოდენობით ფულად ჯილდოებს ყოველდღიურად, შემთხვევითი შერჩევის პრინციპით გაათამაშებს. გარდა ამისა, იქნება ყოველკვირეული და ასევე, წლის ბოლოს შემაჯამებელი გათამაშება.

ლატარიასთან დაკავშირებით მეტი ინფორმაცია იხილეთ: