თებერვალში ცნობილი გახდა, რომ ანჯელინა ჯოლისა და ბრედ პიტის საკულტო ფილმის Mr. and Mrs. Smith-ის ახალ ადაპტაციაში, რომელსაც სერიალის სახით ვიხილავთ, ფიბი უოლერ-ბრიჯი და დონალდ გლოვერი ითამაშებდნენ. სამწუხაროდ, გულშემატკივრების სიხარული დიდხანს არ გაგრძელდა, რადგან ცოტა ხნის წინ ცნობილი გახდა, რომ ფიბი სერიალს ტოვებს და მისის სმიტის როლზე მის შემცვლელს ეძებენ.

გავრცელებული ინფორმაციის მიხედვით, ფიბის სერიალიდან წამოსვლის მიზეზი მასსა და დონალდ გლოვერს შორის აზრთა სხვადასხვაობა გახდა. გლოვერი სერიალის იდეის ავტორი, თანაშემქმნელი და პროდიუსერია. როგორც ჩანს, ფიბისა და გლოვერს ახალი პროექტის შესახებ განსხვავებული ხედვები ჰქონდათ.

ფიბი და დონალდი ისევ მეგობრებად რჩებიან, თუმცა აღნიშნული პროექტის ფარგლებში მათი გზები გაიყო. ჯერჯერობით სერიალის გამოსვლის თარიღი — 2022 წელი უცვლელია.

ფიბი უოლერ-ბრიჯი ამჟამად ინდიანა ჯონსის მე-5 ნაწილზე მუშაობს, რომელსაც 2022 წლის 29 ივლისს ვიხილავთ.

Mr. and Mrs. Smith ტელეეკრანებზე 2005 წელს გამოვიდა და პოპულარულობას დღემდე არ კარგავს. 16 წლის შემდეგ კი ამაზონი ფილმის მიხედვით სერიალზე მუშაობს. ვინ შეცვლის ფიბი უოლერ-ბრიჯს და გაამართლებს თუ არა სერიალი გულშემატკივრების იმედებს, ამას დრო გვიჩვენებს.