დაავადებათა კონტროლის ეროვნული ცენტრის (NCDC) ხელმძღვანელი ამირან გამყრელიძე სტუდენტებს ვაქცინაციისკენ მოუწოდებს. გამყრელიძე რუსთავი 2-თან ამბობს, რომ სექტემბერი და ოქტომბერი აცრების გააქტიურების 2 თვე უნდა იყოს. ქვეყნის მთავარი ეპიდემიოლოგი აცრისკენ მოუწოდებს სკოლის მოსწავლეების მშობლებსაც.

"განსაკუთრებით მინდა მივმართო პედაგოგ-მასწავლებლებს, როგორც სკოლების, ისე უმაღლესი სასწავლებლების პროფესორ-მასწავლებლებს, რომ ჩვენ ეს მთავარი პროცესი ქვეყანაში — სწავლა რომ დავიწყოთ, აუცილებელია მათი მაქსიმალური რაოდენობით აცრა. უნივერსიტეტების სტუდენტები უკვე აუცილებელია, რომ იყვნენ აცრილი, რადგან ოქტომბერში, როცა დასწრებული სწავლა უნდა აღდგეს ქვეყანაში, განსაკუთრებით პატარა ბავშვებისთვის პირველი 5-7 კლასის ბავშვებისთვის აუცილებელია, მათ უჭირთ ეს ონლაინ სწავლა. გაითავისოს თითოეულმა მშობელმა, ყველას ხომ უნდა, რომ ბავშვი სკოლაში დადიოდეს, აიცრას თითოეული მშობელი", — ამბობს NCDC-ის ხელმძღვანელი.

Stopcov.ge-ზე გამოქვეყნებული ინფორმაციის თანახმად, ამ დროისათვის სულ ჩატარდა 1 314 104 აცრა, დღიურად აცრილია — 22 733 ადამიანი.

5 სექტემბრის მონაცემებით, საქართველოში კორონავირუსის 2 210 ახალი შემთხვევა დადასტურდა, გამოჯანმრთელდა 5 587, ხოლო გარდაიცვალა — 74 ადამიანი.

ქვეყანაში Covid-19-ის პანდემიის გავრცელებიდან დღემდე დადასტურებული შემთხვევების საერთო რაოდენობა შეადგენს 564 837-ს, მათგან გამოჯანმრთელდა — 514 768, ხოლო ვირუსს ჯამში ემსხვერპლა 7 806 ადამიანი.