პრემიერმინისტრმა, ირაკლი ღარიბაშვილმა ტყიბულის მერობის კანდიდატის წარდგენისას განაცხადა, რომ მეშახტეებს შეხვდა, ხოლო მათ ერთ-ერთ მთავარ საკითხად ტურიზმის განვითარება წამოაყენეს.

"ეს ისტორიული ქალაქი მართლაც გამორჩეულია თავისი სილამაზით, თავისი არაჩვეულებრივი ბუნებით და უზარმაზარი პოტენციალით ტურიზმის განსავითარებლად. მე ახლახანს შევხვდი მეშახტეებს, მე მინდა მათ საჯაროდ მადლობა გადავუხადო, სოლიდარობა და მადლიერება გამოვხატო მათ მიმართ. განვიხილეთ რამდენიმე საკითხი, გადავუწყვიტეთ ადგილზე საკითხები და ერთ-ერთი მთავარი საკითხი, რომელიც მათი მხრიდან იქნა წამოყენებული, იყო სწორედ ტურიზმის განვითარება", — აცხადებს ღარიბაშვილი.

აღსანიშნავია, რომ მეშახტეები ადგილზე არსებულ სამუშაო პირობებს ხშირად აპროტესტებენ. მათი ბოლო გაფიცვა 2 თვის წინ, 3 ივლისს დაიწყო. მეშახტეები ხელფასების მომატებას ითხოვდნენ, ამავე მიზეზით მიმდინარე წლის თებერვალში ძიძიგურის სახელობის შახტის 9 მუშა პროტესტის ნიშნად შახტიდან არ ამოდიოდა.

გასული წლის მარტში სამსახურებრივი მოვალეობის შესრულების დროს, 5 მეშახტე მოიწამლა. მეშახტეები მოწამვლას ძიძიგურისა და მინდელის სახელობის შახტების დამაკავშირებელ გვირაბში დაგროვილ მხუთავ აირებს უკავშირებდნენ.

გაიგეთ მეტი: