ტყიბულში, ძიძიგურის სახელობის შახტის 9 მუშა პროტესტის ნიშნად შახტიდან არ ამოდის. ისინი კომპანიის მხრიდან განახევრებული ხელფასების დარიცხვას აპროტესტებენ. პროფკავშირების წარმომადგენლის, თამაზ დოლაბერიძის თქმით, იანვარში დაგეგმილზე ნაკლები ქვანახშირის მოპოვების გამო, მეშახტეებს კომპანიამ ნაკლები ხელფასი დაუანგარიშა, რასაც დასაქმებულების პროტესტი მოჰყვა.

პროფკავშირში საქნახშირის ამ მიდგომას არასწორს უწოდებენ და აცხადებენ, რომ კომპანიის მხრიდან არ მომხდარა შეფასება, რამ გამოიწვია გეგმის არ შესრულება.

"ეს არ იყო დასაქმებულების ბრალი. ხანძარსაშიშროება იყო ნახშირის მოპოვების დროს და ამიტომ ვერ შესრულდა გეგმა. ამის გამო განახევრებული ხელფასები გამოუწერეს. ჯერ უნდა მომხდარიყო შეფასება და მეშახტეები არ უნდა დაზარალებულიყვნენ. ჯერჯერობით ადეკვატური რეაქცია არ აქვს [კომპანიას], — ამბობს თამაზ დოლაბერიძე On.ge-სთან.

მისივე თქმით, საქნახშირის არაადეკვატური პოზიცია იმაშიც გამოიხატება, რომ შინაგანი წესის დარღვევისთვის კომპანია პროტესტის მონაწილეების სამსახურიდან გათავისუფლებასაც აპირებს.

კომპანია საქნახშირში დასაქმებულების პროტესტს გაურკვეველს უწოდებენ. მათი მტკიცებით, N4 ნახშირმომპოვებელი უბნის თანამშრომლები გაურკვეველი მიზეზით, შახტიდან ამოსვლაზე უარს აცხადებენ, რამაც, როგორც კომპანია ირწმუნება, უსაფრთხოების წესების უხეში დარღვევა და ავარიული სიტუაცია გამოიწვია.

"ინციდენტის დაწყების მომენტიდან კომპანია შეეცადა, გაერკვია მომხდარის მიზეზი, რის შემდეგაც იკვეთება, რომ, სავარაუდოდ, აღნიშნული შესაძლებელია უკავშირდებოდეს N4 ნახშირმომპოვებელი უბნის მუშაობის იანვრის თვის შედეგების შეჯამებას. 10 თებერვალს, დღის 11 საათზე, საქნახშირის ადმინისტრაციულ კორპუსში ჩატარდა სამუშაო შეხვედრა. შეხვედრის ინიციატორები იყვნენ მე-5 უბნის ხელმძღვანელები და მოხდა იანვრის თვის შედეგების შეჯამება-განხილვა", — აცხადებენ კომპანიაში.

მათივე თქმით, საერთო ჯამში, იანვრის მონაცემები და უბნების მიერ მოპოვებული ნახშირის რაოდენობა ასეთია:

• II უბანმა 6100 ტონა მოიპოვა და გეგმა 110.9 % -ით შეასრულა, რაც მოიცავს 91.01 ₾ დღეზე;
• VI უბანმა მოიპოვა 5405 ტონა, გეგმა შესრულდა 108.1 % - ით. ანაზღაურებამ შეადგინა 90.00 ₾ დღეზე;
• IV უბანმა მოიპოვა 4660 ტონა, გეგმა შესრულდა მხოლოდ 77.7 % -ით. ანაზღაურებამ დღეზე 48.00 ₾ შეადგინა.

"აღსანიშნავია, რომ VI და II უბნის თანამშრომლებმა იანვრის თვეში გადაჭარბებით შეასრულეს გეგმა და შესაბამისად, შრომითი ხელშეკრულების მიხედვით, მათ ანაზღაურებას ბონუსიც დაემატა. IV უბანმა კი გეგმის მხოლოდ 77.7 % შეასრულეს რაც შრომითი ხელშეკრულების შესაბამისად (რომელიც თანამშრომლებსა და კომპანიას შორის არის გაფორმებული) მათ გამომუშავებულ ანაზღაურებაზე აისახა", — აღნიშნავენ საქნახშირში.

კომპანიაში, ასევე აცხადებენ, რომ N4 ნახშირმომპოვებელ უბნის თანამშრომლებისა და საქნახშირის ადმინისტრაციის ერთობლივი ინიციატივით, სპეციალური კომისია შედგა, რომელიც უახლოესი 10 დღის ვადაში იმ გარემოებებს შეისწავლის, რის გამოც IV უბნის თანამშრომლებმა გეგმა ვერ შეასრულეს.

მათივე ცნობით, თანამშრომელთა უფლებებისა და უსაფრთხოების დაცვის მიზნით, კომპანიის ხელმძღვანელობის გადაწყვეტილებით, უსაფრთხოების წესების დარღვევის ლიკვიდაციამდე, (მიმდინარე წლის 11 თებერვლის 23:55 საათიდან) N4 ნახშირმომპოვებელ უბანში შახტის დამხმარე ჭაურით ხალხის ჩაყვანა შეჩერდა.

"აღნიშნული ჭაურით მოხდება იმ პერსონალის ჩაყვანა და ამოყვანა, რომლებიც უზრუნველყოფენ შახტის სიცოცხლისუნარიანობის შენარჩუნებას. 11 თებერვლის პირველი ცვლიდან N4 ნახშირმომპოვებელ უბანში პერსონალის გადაყვანა მოხდება მინდელის სახელობის შახტიდან, ვიდრე აღნიშნული ვითარების ლიკვიდაცია არ მოხდება. მათი ტრანსპორტირებისთვის გამოყოფილი იქნება ავტოტრანსპორტი.

N4 მომპოვებელი უბნის თანამშრომლებს არ ეზღუდებათ სასადილოთი სარგებლობა და სურვილის შემთხვევაში, საკვების მიღების შემდეგ, შეძლებენ უკან დაბრუნდნენ", — ირწმუნებიან კომპანიაში.

აღსანიშნავია, რომ ტყიბულის შახტში დასაქმებულები ადგილზე არსებულ სამუშაო პირობებს ხშირად აპროტესტებენ. გასული წლის მარტში სამსახურებრივი მოვალეობის შესრულების დროს, 5 მეშახტე მოიწამლა. მეშახტეები მოწამვლას ძიძიგურისა და მინდელის სახელობის შახტების დამაკავშირებელ გვირაბში დაგროვილ მხუთავ აირებს უკავშირებდნენ.