თბილისის სახელმწიფო უნივერსიტეტის რექტორის მოვალეობის შემსრულებლმა დარეჯან თვალთვაძემ წუხელ, 24 მაისს განცხადება, გაავრცელა სადაც წერს, რომ აუდიტორია 115-ის სტუდენტის ცემაში მონაწილეს, დადასტურების შემთხვევაში, შესაძლოა სტუდენტის სტატუსი შეუჩერდეს:

"ჩვენ არ უნდა დავუშვათ, რომ გარკვეული პროვოკაციების საფუძველზე უნივერსიტეტში სიტუაცია კიდევ უფრო დავძაბოთ. მოვუწოდებ ყველა სტუდენტს, პროფესორს, უნივერსიტეტის თანამშრომელს იყვნენ ფხიზლად, რათა მსგავსი ფაქტები არ გამეორდეს და არ გადაიზარდოს უფრო დიდ დაპირისპირებაში".

როგორც დარეჯან თვალთვაძემ აღნიშნა, სტუდენტებს შორის მომხდარ ფაქტს, მათ შორის უნივერსიტეტის ვიდეოკამერებით დაფიქსირებულ ვიდეოჩანაწერს, სოციალურ ქსელში გავრცელებულ მასალებს და იმ ფაქტებს, რაც დაპირისპირებას წინ უძღოდა, შეისწავლის უნივერსიტეტის ეთიკის კომისია და შესაბამის გადაწყვეტილებას მიიღებს.

აუდიტორია 115-ს წევრები აცხადებენ, რომ 24 მაისს, თსუ-ს თვითმმართველობის წარმომადგენლებმა მათ ერთ წევრს ფიზიკური შეურაცხყოფა მიაყენეს. მათივე მტკიცებით, ფაქტი უნივერსიტეტის სათვალთვალო კამერებმაც დააფიქსირა. აღნიშნულს უარყოფენ სტუდენტური თვითმმართველობის წევრები.