აუდიტორია 115-ს წევრები აცხადებენ, რომ თსუ-ს თვითმმართველობის წარმომადგენლებმა მათ ერთ წევრს ფიზიკური შეურაცხყოფა მიაყენეს. როგორც სტუდენტური მოძრაობის წარმომადგენელი, ნათია ქარჩილაძე On.ge-სთან საუბარში განმარტავს, მომხდარის გამო თსუ-ს დაცვამ პოლიციაც გამოიძახა, თუმცა სამართლდამცავები უნივერსიტეტში ჯერაც არ მისულან:

"ჩვენი ერთ-ერთი წევრი მოდიოდა ლექციიდან და თვითმმართველობის 20-მდე წევრმა სცემა. ისეთი რაღაც მოხდა, რომ დაუძახეს, მივიდა და მოკლედ, 20-მდე კაცმა სცემა ჩვეულებრივად".

ქარჩილაძე ასევე ამბობს, რომ ფაქტი დააფიქსირა უნივერსიტეტში დამონტაჟებულმა ვიდეო კამერებმაც და თუ აუდიტორია 115 ამ კადრებს გამოითხოვს, აუცილებლად გაავრცელებს.

ფაქტს, რომ ინციდენტი კამერებმა დააფიქსირეს, თსუ-ს თვითმმართველობის წევრი, პაატა ბახტურიძეც ადასტურებს, თუმცა თვითმმართველობის მიერ აუდიტორია 115-ის წევრის ფაქტს უარყოფს. ის განმარტავს, რომ თავად მოუვიდა აუდიტორია 115-ის წარმომადგენელთან შელაპარაკება:

"გამოიარა [აუდიტორია 115-ის წევრმა], მერე მე მითხრა, რა თქვი ბიჭოო და მე ვერ მივხვდი რაზე მეუბნებოდა. შემდეგ გამოიწია, თავი მომიქნია, ხელი მომიქნია და მეთვითონ დავიჭირე და არ მივეცი ამის საშუალება, ვერ მოახერხა ეს ხელის დარტყმა. შემდეგ ძალიან ბევრი ხალხი იყო, დაცვა იყო, აუდიტორია 115-ელები ამოვიდნენ, აქიდან თვითმმართველობა გამოვიდა, არეულ-დარეული სიტუაცია შეიქმნა. ვინმეს რომ გაელახა ან ეგეთი რაღაც რომ ყოფილიყო, ეგეთი არაფერი ყოფილა. ბოლომდე ვცდილობდი მე, რომ გამეჩერებინა ეს ადამიანი, მეთვითონ ვიყავი ამ ადამიანზე ჩახუტებული და მაგისთვის რომ ხელი დაერტყა ვინმეს, მეც მომხვდებოდა და მე არ მომხვედრია არაფერი".

ბახტურიძის განმარტებით, აუდიტორია 115-ის წევრები დილიდან მობილიზებულები არიან და თვითმმართველობის წევრების პროვოკაციაზე წამოგებას ცდილობენ.