პარტია დროას და ოპოზიციის მაჟორიტარობის კანდიდატი ბათუ ქუთელია აცხადებს, რომ საქართველოს მთავრობის მხრიდან ევროკავშირის მაკროფინანსური დახმარების მეორე ნაწილის არაღება ევროკავშირის დროშის კიდევ ერთხელ, ვირტუალურად დაწვას ნიშნავს. მისი თქმით, ქართულმა ოცნებამ ამ ფორმით ზურგი აქცია ევროკავშირს და მოატყუა მოსახლეობა, თითქოს დახმარების მიღებაზე თავად თქვეს უარი.

"ეს სხვა მეტი არაფერი არ არის, თუ არა ვირტუალურად, კიდევ ერთხელ ევროკავშირის დროშის დაწვა. როდესაც ასეთი ფორმით და თან ტყულით, ევროკავშირის განცხადებამ დაადასტურა კიდეც... თუმცა ისედაც ვიცოდით, რომ ეს ასე იყო — ერთი მხრივ ის, რომ ოფიციალურად უარი თქვეს ევროკავშირზე. მეორე მხრივ, ამ პირობებში, როდესაც ქვეყანას ამხელა პრობლემები აქვს ჯანდაცვის კუთხით, ეკონომიკის კუთხით, გამოდის პრემიერი და კადრულობს იმას, რომ ატყუებს თავის ქვეყნის მოსახლეობას, თურმე თვითონ უთქვამთ უარი ამაზე", — განაცხადა ქუთელიამ ფორმულას ეთერში.

შეგახსენებთ, პრემიერმინისტრის, ირაკლი ღარიბაშვილის განცხადებით, გადაწყვეტილი აქვთ, რომ ევროკავშირისგან მაკროფინანსური დახმარების მეორე ნაწილის აღებისგან თავი შეიკავონ, რადგან მთავრობამ დაიწყო საგარეო ვალის შემცირება და ამ თანხის მიღების აუცილებლობა, სავარაუდოდ, აღარ იქნება. მანამდე, 30 აგვისტოს, ქართული ოცნების თავმჯდომარემ, ირაკლი კობახიძემ განაცხადა, რომ ევროკავშირისგან მაკროსაფინანსო დახმარებას "ფინანსური დატვირთვა აღარ აქვს".

ამასთანავე, საქართველოში ევროკავშირის წარმომადგენლობის ხელმძღვანელის მოვალეობის დროებითი შემსრულებლის, ჟულიენ კრამპის განცხადებით, პატივს სცემენ ხელისუფლების გადაწყვეტილებას, არ მიიღოს ევროკავშირის მაკროფინანსური დახმარება, თუმცა აქვე აღნიშნავენ, რომ საქართველომ მისი მიღების პირობები ვერ შეასრულა. ევროკავშირის განცხადებით, საქართველოსთვის გასაცემი დახმარება დამოკიდებული იქნება ძირითადი რეფორმების განხორციელებისას მიღწეულ წინსვლაზე.

24 აგვისტოს, პრემიერ ღარიბაშვილთან შეხვედრის შემდეგ, ევროპული საბჭოს პრეზიდენტმა, შარლ მიშელმა განაცხადა, რომ რეფორმები ახლა ისეა საჭირო, როგორც არასდროს. მისივე თქმით, "მოსალოდნელი მაკროსაფინანსო დახმარების გაცემის ვადა ახლოვდება და დროა, საქართველოს მთავრობამ აჩვენოს, რომ ერთგულია შეთანხმების, განსაკუთრებით რეფორმების ნაწილში".

გაიგე მეტი: