საქართველოს საგარეო საქმეთა მინისტრი მიხეილ ჯანელიძე რუსეთის ფედერაციასა და ოკუპირებულ ცხინვალს შორის გაფორმებულ შეთანხმებას გამოეხმაურა. ჯანელიძის თქმით, ყოველგვარი ე.წ. შეთანხმება რუსეთის ფედერაციასა და დე-ფაქტო ხელისუფლებებს შორის არის არალეგიტიმური:

"ამით სამართლებრივად არაფერი არ იცვლება. მათი აღიარება არ ხდება არათუ ჩვენი მხრიდან, არამედ საერთაშორისო საზოგადოების მხრიდანაც".

ჯანელიძის განცხადებით, რუსეთის ფედერაციამ უნდა შეასრულოს 2008 წლის ცეცხლის შეწყვეტის შეთანხმებით ნაკისრი ვალდებულებები:

"სამხედრო კუთხით საოკუპაციო რეჟიმი აგრძელებს თავის ქმედებებს და ჩვენ დარწმუნებული ვართ, რომ საერთაშორისო საზოგადოება კიდევ ერთხელ მისცემს შესაბამის შეფასებას ყველა ამ ქმედებას".

რუსეთის პრეზიდენტმა ვლადიმერ პუტინმა გუშინ, 14 მარტს დაამტკიცა ბრძანებულება, რომლის მიხედვითაც საქართველოს ოკუპირებული რეგიონის, დე-ფაქტო სამხრეთ ოსეთის, ჯარის ნაწილი რუსეთის არმიას შეუერთდება.

შეთანხმების მიხედვით, რუსეთი თვითგამოცხადებული სამხრეთ ოსეთის ჯარის ქვედანაყოფებს კონტრაქტორებად მიიღებს იმ შემთხვევაში, თუ ისინი ცხინვალში ჯარში მსახურების მოვალეობებისგან გათავისუფლდებიან.

რუსეთის პრეზიდენტმა, მსგავსი ტიპის ბრძანებულებას, კერძოდ, რუსეთსა და ოკუპირებულ აფხაზეთს შორის შეიარაღებული ძალების გაერთიანების თანხმობის, ნოემბერში მოაწერა ხელი.

რა შედეგს მოიტანს გალის სამხედრო ქალაქად ჩამოყალიბება