ოქტომბერში ჰელოუინი ერთადერთი საშიში მოვლენა ნამდვილად არ იქნება. ჯო გოლდბერგი ახალი მზაკვრული გეგმებით ამჯერად მამის ამპლუაში გვიბრუნდება. საკუთარ შვილს ჯო ტორტის მომზადების სისხლისგამყინავი ვიდეოთი გვაცნობს და მე-3 სეზონის პრემიერის თარიღსაც გვიმხელს. ჯო თავის უცნაურ ახალ ოჯახთან ერთად 15 ოქტომბერს დაგვიბრუნდება:

You-ს მესამე სეზონი კალიფორნიაში ჯოსა და ლავის ახალი ოჯახური ცხოვრებით იწყება. მათ შვილი — ჰენრი ჰყავთ, თუმცა წყვილის ურთიერთობა დაძაბულია. ჯომ მე-2 სეზონის ბოლოს თვალი ახალ მეზობელს დაადგა, რაც, დიდი ალბათობით, მასზე არანაკლებ დაკვირვებულ და საშიშ ლავს ნამდვილად არ გამოეპარება.

ქეროლაინ კეპნესის წიგნის მიხედვით გადაღებული სერიალი მაყურებელმა პირველად 2018 წელს იხილა. მესამე სეზონში ისევ ვიხილავთ პენ ბეჯლისა და ვიქტორია პედრეტის. რა თქმა უნდა, სერიალს ახალი სახეები და პერსონაჟებიც შემოუერთდებიან, რომელთაც ჯოსა და ლავის ინტრიგებში გზის გაკვლევა და გადარჩენა მოუწევთ.