ქართული ოცნების გენერალური მდივანი, კახა კალაძე აცხადებს კატეგორიულად მიუღებელია ძალადობა როგორც ჟურნალისტის, ისე სასულიერო თუ სხვა პირების მხრიდან. ასე გამოეხმაურა იგი თალვკეთულას მონასტერში მცხოვრები ბერი იოანეს მიერ ჟურნალისტის გინებასა და შეურაცხყოფას.

"რა მნიშვნელობა აქვს ჟურნალისტი ძალადობს, ბერი ძალადობს, პოლიტიკოსი ძალადობს თუ უბრალოდ, რიგითი მოქალაქე ძალადობს. ძალადობა არის თვითონ კატეგორიულად მიუღებელი. ყველაფერი უნდა გავაკეთოთ ჩვენ იმისთვის, რომ მაქსიმალურად, როგორც ფიზიკური ძალადობა, როგორც ფსიქოლოგიური ძალადობა ... ამის წინააღმდეგ უნდა ვიმოქმედოთ ერთად, თუ გვინდა, რომ ქვეყანა გადავარჩინოთ, თუ გვინდა, რომ ვიზრუნოთ მომავალზე, განვითარებაზე, სიმშვიდეზე და სტაბილურობაზე", — განაცხადა კახა კალაძე.

ქართული ოცნების დეპუტატის, გურამ მაჭარაშვილის განცხადებით, კონკრეტული სასულიერო პირი გინება და მედიაზე მუქარა არ არის იმის საფუძველი, რომ "ვისაუბროთ პრობლემატიკაზე, სასულიერო პირებსა და ჟურნალისტებს შორის".

"საქართველოს ეკლესიის წარმომადგენლები აბსოლუტურად ყველა კითხვაზე სცემენ პასუხს და არ მგონია, რომ პრობლემა რომელიმე ეპისკოპოსს ან სასულიერო პირს ჰქონდეს. ამიტომ იმის ძიება ახლა, რომ რომელიმე სასულიერო პირმა სადღაც, რომელიღაც მონასტრის წინ თუ მონასტერში, რაღაც ჟურნალისტისთვის მიუღებელი ფრაზები თქვა, არ მგონია, რომ იყოს იმის საფუძველი, რომ ჩვენ ვისაუბროთ პრობლემატიკაზე, სასულიერო პირებსა და ჟურნალისტებს შორის", — განაცხადა მაჭარაშვილმა.

• "გარკვეული გადაცდომა" — როგორ აფასებს საპატრიარქო ბერის მიერ ჟურნალისტის გინებასა და შეურაცხყოფას

28 აგვისტოს, ტელეკომპანია ფორმულამ გაავრცელა კადრები, სადაც ჩანს, რომ სასულიერო პირმა ჟურნალისტს სიტყვიერი შეურაცხყოფა მიაყენა, დამამცირებელი და ჰომფობიური ტერმინებით მოიხსენია და აგინა. თალვკეთულას მონასტერში ჟურნალისტები იმის გასარკვევად ჩავიდნენ, მიმდინარეობს თუ არა მონასტერში უკანონო მშენებლობა, რამაც ბერის აგრესია გამოიწვია.

ჟურნალისტის რეპლიკას, რომ ჩაწერის უფლება აქვთ, სასულიერო პირი შეურაცხმყოფელი ფრაზებით პასუხობს:

"რაის უფლება გაქვთ, არაფრის უფლება არა გაქვთ. რა უფლება გაქვს? საიდან მოიგონე, რომ უფლება გაქვს. ჟურნალისტი კი არა, პირშისტი ხარ რა, გიყურებ. პირში არ აგიღია, ტო? წადი შენი, დედას დავეცი ახლა რა".

აღსანიშანავია, რომ 22 აგვისტოს დეკანოზმა ილია ჭიღლაძემ გაავრცელა ვიდეო, სადაც ჩანს, რომ ბერი იოანე კაცს შეურაცხყოფას აყენებს ჯგუფური გაუპატიურებით ემუქრება. 26 აგვისტოს კი სამხრეთის კარიბჭემ გაავრცელა აუდიოჩანაწერი, რომელშიც ბერი ამბობს, რომ "ძველი განგსტერია" და დაჭერის არ ეშინია. მისი თქმით, მონასტერში მიმდინარე მშენებლობაზე სააგენტოდან არაერთხელ გააფრთხილეს, მაგრამ საჭიროდ არ მიიჩნევს, რომ მათ რამე შეუთანხმოს.