კითხვასთან დაკავშირებით ბევრი მითი არსებობს, მაგრამ ახალი კვლევის შედეგების მიხედვით, წიგნების სიყვარული, სხვა თანმხლებ სიკეთეებთან ერთად, სიცოცხლესაც ახანგრძლივებს.

კვლევა ჟურნალ Social Science & Medicine-ში გამოქვეყნდა და მასში 50 წელს გადაცილებული 3635 ადამიანი მონაწილეობდა. მეცნიერებმა დაბერების ტემპებზე დაკვირვებით დაადგინეს, რომ მკითხველები არამკითხველებზე დაახლოებით 23 თვით, ანუ 2 წელიწადით მეტს ცოცხლობენ. კვლევამ ასევე გამოავლინდა, რომ იმ ადამიანების გარდაცვალების შანსი, რომლებიც კვირაში მინიმუმ 3-5 საათს კითხულობენ, 23%-ით ნაკლებია მათთან შედარებით, ვინც ამდენ დროს არ უთმობს წიგნის კითხვას. კვლევის მიხედვით, მნიშვნელოვანი საკითხია თავად საკითხავი მასალის თავისებურებაც.

კვლევის ერთ-ერთი ავტორი, ენვი ბევიში აღნიშნავს: წიგნების ამ სასიკეთო ეფექტს განაპირობებს მკითხველის გონების ჩართულობა წიგნის სიუჟეტში - ეს აზროვნების პროცესს აუმჯობესებს და სიცოცხლეს ახანგრძლივებს. დიდი მნიშვნელობა აქვს იმასაც, თუ რას კითხულობს ადამიანი - წიგნებსა თუ ჟურნალ-გაზეთებს.

წიგნის კითხვის დროს ტვინში რთული პროცესები მიმდინარეობს. მკითხველი ნელ-ნელა იძირება ნაწარმოებში, მაგრამ ამავე დროს, არ კარგავს კავშირს სამყაროსთან და გამუდმებით ავლებს პარალელებს. გარდა ამისა, წიგნები ხელს უწყობს ემპათიისა და ემოციური ინტელექტის განვითარებას, რაც გადარჩენისთვის აუცილებელი თვისებებია.

ასე რომ, წიგნების კითხვა არა მხოლოდ საინტერესო იდეებს გაცნობთ, არამედ სიცოცხლის წლებსაც გმატებთ.

საინტერესოა, გამოიკვლევენ თუ არა შემდეგში კავშირს კონკრეტული ავტორის ნაწარმოებებსა და სიცოცხლის გახანგრძლივებას შორის. აი, მაგალითად, ტონი მორისონის კითხვა მეტად ახანგრძლივებს სიცოცხლეს, თუ ჩარლზ ბუკოვსკის? შექსპირისა თუ ელიოტის? იმედია, მეცნიერები ამ კითხვებსაც მოუძებნიან პასუხებს.