დაავადებათა კონტროლის ეროვნული ცენტრის ხელმძღვანელის, ამირან გამყრელიძის თქმით, ამ ეტაპზე დიღმის საველე ჰოსპიტლის ფუნქციონირების საჭიროება აღარ არის, რადგან საავადმყოფოებში საკმარისი რაოდენობის საწოლებია და გამოჯანმრთელებული ადამიანების რაოდენობა იმატებს.

"დღეს, რადგან აქტიური შემთხვევების რიცხვი მცირდება ქვეყანაში, ჰოსპიტლის საჭიროება ამ ეტაპზე იხსნება, გვყოფნის საწოლები, გაშლილი საავადმყოფოებში, მაგრამ ეს არ წყვეტს ფუნქციონირებას, რა თქმა უნდა, ის დარჩება მზადყოფნის რეჟიმში თუ ამის საჭიროება დადგა. დღეს საწოლების რაოდენობა საკმარისია, გაწერები, როგორც გითხარით, მომატებულია, გამოჯანმრთელება მეტია ბოლო დღეებში, ვიდრე ინფიცირება და ამის გამო აღარ არის საჭიროება ამ ეტაპზე საველე ჰოსპიტლის ფუნქციონირების", — განაცხადა გამყრელიძემ.

15 აგვისტოს, დიღმის ოლიმპიური სოფლის ერთ-ერთ სპორტულ დარბაზში საველე ჰოსპიტლის მოწყობა დაიწყო. 20 აგვისტოს, ჯანდაცვის მინისტრის მოადგილემ, თამარ გაბუნიამ განაცხადა, რომ დიღმის საველე ჰოსპიტალმა უკვე მიიღო პაციენტები.