ჯანდაცვის მინისტრის მოადგილის, თამარ გაბუნიას განცხადებით, დიღმის საველე ჰოსპიტალმა პაციენტების მიღება უკვე დაიწყო. ამ დროისთვის იქ 9 პაციენტია.

"გუშინ, საღამოს დადგა აუცილებლობა, რომ საველე ჰოსპიტლის ოპერირება უკვე დაგვეწყო, 9 პაციენტი განთავსდა საველე ჰოსპიტალში, მათი მდგომარეობა არის საშუალო სიმძიმის და ჰოსპიტალი დღეიდან უკვე სრული დატვირთვით შეუდგება ფუნქციონირებას", — თქვა გაბუნიამ.

გაბუნიას განმარტებით, საველე ჰოსპიტალი დროებითი დაყოვნებისთვის არის და პაციენტის მდგომარეობისა და თავისუფალი ადგილების მიხედვით იქნება შესაძლებელი კლინიკაში გადაყვანა.

"საველე ჰოსპიტალი ძირითადად არის დროებით დაყოვნებისთვის, ანუ ამ შემთხვევაში ჩვენთვის მთავარია, რომ მოხდეს პაციენტის დროებითი სტაბილიზაცია და შემდეგ მისი გადამისამართება სიმძიმიდან გამომდინარე. ვფიქრობთ, რომ 2-3 დღეზე მეტი არ უნდა მოგვიხდეს საველე ჰოსპიტალში პაციენტის დაყოვნება და შემდეგ მოხდება მისი გადაყვანა იმისდა მიხედვით, სასტუმროში ან სხვა ჰოსპიტალში, სადაც იქნება მისი მართვისთვის სტაციონარი", — აღნიშნა თამარ გაბუნიამ.

კითხვაზე, ნიშნავს თუ არა, რომ ახლა ჰოსპიტალურ სექტორში ადგილები აღარ არის, გაბუნია პასუხობს:

"ჰოსპიტალური სექტორი არის მაქსიმალური დატვირთვით, ადგილი თუ თავისუფლებდა, ხდება მაშინვე ამ ადგილის შევსება, არის, რა თქმა უნდა, რამდენიმე სარეზერვო ადგილი, მაგრამ ისე, რომ იყოს თავისუფალი ადგილები, ძირითადად ხდება ბრუნვის ხარჯზე ამ პაციენტების მიღება"

15 აგვისტოს ცნობილი გახდა, რომ დიღმის ოლიმპიური სოფლის ერთ-ერთ სპორტულ დარბაზში საველე ჰოსპიტალი მოეწყობოდა. თუმცა ტიკარაძის განმარტებით, ჯანდაცვის სამინისტრო გააკეთებდა ყველაფერს, რომ კორონავირუსის მართვა ჰოსპიტალურ სექტორში დარჩენილიყო და საველე ჰოსპიტლები უკიდურეს შემთხვევაში გამოიყენებინათ.

20 აგვისტოს მონაცემებით, საქართველოში კორონავირუსის 4 743 ახალი შემთხვევა დადასტურდა, გამოჯანმრთელდა 3 393, ხოლო გარდაიცვალა — 59 ადამიანი.