ჯანდაცვის მინისტრი ეკატერინე ტიკარაძე არჩევნების გადადების აუცილებლობას ვერ ხედავს. მისი თქმით, ქორწილები, ქელეხები და მსგავსი ტიპის "ფარული" თავშეყრები გაცილების დიდი საფრთხის შემცველია, ვიდრე არჩევნების ჩატარება.

"ჩვენ ვთვლით, რომ გაცილებით უფრო დიდი საფრთხის შემცველია ქორწილები და ქელეხები, რომლებიც იმართებოდა და როგორც ახლა თქვენმა კოლეგამ დააფიქსირა, გარკვეული შეხვედრები, რომლებიც ფარულად იმართება, ვინაიდან სწორედ ამ პროცესში ხდება ინფექციის გავრცელება", — ამბობს მინისტრი.

არჩევნებთან დაკავშირებით ტიკარაძე კი აღნიშნავს, რომ ოქტომბრისთვის ეპიდსიტუაციის დასტაბილურებას ელიან და თუ ჯანმოს მიერ გაცემული ყველა რეკომენდაცია შესრულდება, არჩევნები უსაფრთხოდ ჩაივლის.

"რაც შეეხება არჩევნებს, ჩვენ ცესკოსთან ერთად აქტიურად ვმუშაობთ იმისთვის, რომ უფრო დეტალური გავხადოთ ის პროცესი და ის დაცვის მექანიზმები, რომელიც უსაფრთხოს გახდის არჩევნებს. ჩვენ იმ პერიოდისთვის ველოდებით ეპიდემიოლოგიურად კლებას და მნიშვნელოვანია უბრალოდ, რომ ცესკომ, ყველა მოქალაქემ და ყველა პარტიამ გაითვალისწინოს ჯანმოს მხრიდან მიწოდებული ყველა რეკომენდაცია. ამ შემთხვევაში არჩევნები იქნება ნამდვილად უსაფრთხო", — აცხადებს ტიკარაძე.

23 აგვისტოს სახალხო დამცველმა, ნინო ლომჯარიამ განაცხადა, რომ როცა ქვეყანაში დღიურად 60-70 ადამიანი იღუპება და მოქალაქეთა სათანადო რაოდენობა ვაქცინირებული არ არის, არ შეიძლება, "ყველაფერი იყოს ღია". მისი თქმით, ეპიდვითარების დასტაბილურებამდე, საჭიროა რეგულაციების გამკაცრება და არჩევნების გადადებაზე ფიქრი.

ქართული ოცნება არჩევნების გადადებაზე უარს ამბობს. პარტიის ერთ-ერთმა ლიდერმა, მამუკა მდინარაძემ განაცხადა, რომ ოპოზიციას არჩევნებში მონაწილეობა მაინც მოუწევს.

გაიგეთ მეტი: