ქაბულის საერთაშორისო აეროპორტთან შექმნილი ქაოსის ფონზე, ვინც თალიბანის მიერ ქვეყნის ხელში ჩაგდების გამო, ქვეყნის დატოვებას ცდილობენ, 7 ავღანელი დაიღუპა. ამის შესახებ ინფორმაციას Aljazeera ბრიტანელი სამხედროების ინფორმაციაზე დაყრდნობით ავრცელებს.

ინფორმაციაში ასევე აღნიშნულია, რომ სამხედროები არ აკონკრეტებენ, როდის დაიღუპნენ ეს ადამიანები და მათ შორის არის თუ არა ის ოთხი ადამიანი, რომელთა შესახებ ინფორმაცია წინა დღეებში გავრცელდა.

ქაბულში და მათ შორის, აეროპორტთან შექნილ ქაოსში გარდაცვლილთა რაოდენობის შესახებ ჯერჯერობით დაზუსტებული ინფორმაცია არ გავრცელებულა. 21 აგვისტოს Reuters NATO-სა და თალიბანის ოფიციალურ პირებზე დაყრდნობით წერდა, რომ ბოლო კვირის განმავლობაში აეროპორტის ტერიტორიაზე, სულ მცირე, 12 ადამიანი დაიღუპა.

შაბათს, 21 აგვისტოს, აშშ-ის საელჩომ უსაფრთხოების ახალი გაფრთხილება გამოაქვეყნა და მოქალაქეებს მოუწოდა, არ გაემგზავრონ ქაბულის აეროპორტში, თუ აშშ-ის მთავრობის წარმომადგენელთა ინსტრუქციას არ მიირებენ. ეს გაფრთხილება გასცა გერმანიის საელჩომაც და მოუწოდა მოქალაქეებს, აეროპორტში მისვლისგან თავი შეიკავონ, რადგან საელჩოს განცხადებით, თალიბები ტერიტორიაზე კონტროლს სულ უფრო ამკაცრებენ.

ავღანეთიდან აშშ-ის ძალების გასვლის შემდეგ, თალიბანმა მალევე შეძლო და ქაბულიც აიღო – პრეზიდენტი გაიქცა, თალიბებმა ძალაუფლება მოიპოვეს. მათ ხელისუფლების ყველა წარმომადგენლისათვის საყოველთაო "ამნისტია გამოაცხადეს" და მთავრობაში ქალები მიიწვიეს. მათი მტკიცებით, ხალხს შეუძლია, დაუბრუნდეს თავის რუტინულ ყოველდღიურობას, თუმცა ამის ფონზე, დევნიან ქუჩაში დამოუკიდებლობის დღის აღსანიშნავად გამოსულ მოქალაქეებს, ქალებს, რომლის ჩაცმის სტილიც არ მოსწონთ, ჟურნალისტებს. ბოლო დღებში თალიბებმა ათამდე მოკლეს და არაერთი დაჭრეს, მათ შორის, ისინი, ვინც ქვეყნიდან გაქცევას ცდილობდნენ.

გაიგეთ მეტი: