აშშ მოქალაქეებს ურჩევენ, ქაბულის აეროპორტში მისვლას მოერიდონ. ინფორმაციას ამის შესახებ სხვადასხვა საერთაშორისო მედია, მათ შორის, Reuters ავრცელებს.

მედიების ცნობით, ამ გაფრთხილების მიზეზად უსაფრთხოება დაასახელეს, რადგან აეროპორტში ხალხმრავლობაა და ათასობით ადამიანი ქაოსის ფონზე ცდილობს, თვითმფრინავებში ჩასხდომასა და ქვეყნის დატოვებას.

თალიბანმა მათ, ვისაც სამგზავრო დოკუმენტები არ გააჩნია, მოუწოდა, რომ სახლში წასულიყვნენ. გამოცემა NATO-სა და თალიბანის ოფიციალურ პირებზე დაყრდნობით წერს, რომ გასული კვირის მანძილზე აეროპორტის ტერიტორიაზე, სულ მცირე, 12 ადამიანი დაიღუპა.

"ქაბულის აეროპორტში, კარიბჭის გარეთ უსაფრთხოების პოტენციური საფრთხეების გამო, ჩვენ ვურჩევთ აშშ-ს მოქალაქეებს, მოერიდონ აეროპორტში მისვლას, სანამ აშშ-ს მთავრობის წარმომადგენლის მხრიდან ამის შესახებ ოფიციალურ მითითებას არ მიიღებთ", — განაცხადეს საელჩოს წარმომადგენლებმა.

Reuters-ის ცნობითვე, ეს გაფრთხილება გასცა გერმანიის საელჩომაც და მოუწოდა მოქალაქეებს, აეროპორტში მისვლისგან თავი შეიკავონ. საელჩოს განცხადებით, თალიბები ტერიტორიაზე კონტროლს სულ უფრო ამკაცრებენ.

დღეს თალიბანის თანადამფუძნებელი, აბდულ ღანი ბარადარი მოლაპარაკებებისთვის ავღანეთში ჩავიდა. ოფიციალური ინფორმაციით, ის შეხვედრებს გამართავს სამხედრო მეთაურებთან, ყოფილი მთავრობის ლიდერებსა, რელიგიურ სწავლულებთან და "ახალი მთავრობის" ჩამოყალიბებას განიხილავს.

ავღანეთიდან აშშ-ის ძალების გასვლის შემდეგ, თალიბანმა მალევე შეძლო და ქაბულიც აიღო – პრეზიდენტი გაიქცა, თალიბებმა ძალაუფლება მოიპოვეს. მათ ხელისუფლების ყველა წარმომადგენლისათვის საყოველთაო "ამნისტია გამოაცხადეს" და მთავრობაში ქალები მიიწვიეს. მათი მტკიცებით, ხალხს შეუძლია, დაუბრუნდეს თავის რუტინულ ყოველდღიურობას, თუმცა ამის ფონზე, დევნიან ქუჩაში დამოუკიდებლობის დღის აღსანიშნავად გამოსულ მოქალაქეებს, ქალებს, რომლის ჩაცმის სტილიც არ მოსწონთ, ჟურნალისტებს. ბოლო დღებში თალიბებმა ათამდე მოკლეს და არაერთი დაჭრეს, მათ შორის, ისინი, ვინც ქვეყნიდან გაქცევას ცდილობდნენ.

გაიგეთ მეტი: