ავღანეთში მყოფი საქართველოს 6 მოქალაქე უნგრული ბორტით საქართველოში დაბრუნდა. საქართველოს მთავრობის ადმინისტრაციის უფროსის განცხადებით, დანარჩენი 17 მოქალაქის ჩამოსაყვანად მუშაობა გრძელდება.

"ეს პროცესი გრძელდება, რადგან ჩვენი მოქალაქეების გარკვეული ჯგუფი კვლავ იმყოფება ავღანეთში, შესაბამისად, საქართვლო პრემიერ-მინისტრის ადმინისტრაცია აქტიურად მუშაობს ყველა უწყებასთან, საერთაშორისო პარტნიორებთან, რათა მოხდეს დამატებითი ავიარეისების ორგანიზება, რომლის საშუალებითაც უახლოეს პერიოდში ჩვენი მოქალაქეები სამშობლოში უსაფრთხოდ დაბრუნდებიან", — განაცხადა ილია დარჩიაშვილმა.

საგარეო საქმეთა სამინისტროში 15 აგვისტოს განაცხადეს, რომ ავღანეთში კერძო კონტრაქტორად მყოფი საქართველოს მოქალაქეები დახმარების თხოვნით დაუკავშირდნენ და ისინი პარტნიორ ქვეყნებთან კოორდინაციით ცდილობენ მათ გამოყვანას. საგარეო საქმეთა მინისტრის მოადგილის თქმით, ქაბულში ჩარჩენილი ქართველები ყოფილი სახმედრო მოსამსახურეები არიან, საიდანაც 17 კაცი არის დასაქმებული კანადურ კომპანიაში, 6 კი ამერიკულში. მისივე თქმით, საქართველოს მთავრობა გეგმავდა მათი უკრაინის თვითმფრინავით მშვიდობიანად გამოყვანას, თუმცა ქაბულში დაძაბული სიტუაციის გამო ეს ვერ მოხერხდა.