"მოსამართლეებმა მასობრივად დაიწყეს პოლიტიკური დაკვეთების გაპროტესტება," — ამის შესახებ კოალიცია ცვლილებისთვის ლიდერი, დაპატიმრებული ნიკა გვარამია ციხიდან გამოგზავნილ წერილში წერს, რომელიც სოციალურ ქსელში, მის პირად გვერდზე გამოქვეყნდა.

ნიკა გვარამიას განცხადებით, მოსამართლეები "ძალიან შეწუხებულები არიან სოციალური იზოლაციით და მოქალაქეების მხრიდან სამართლიანი გულისწყრომით". მისივე თქმით, "ბევრ მათგანს პრობლემები აქვთ საკუთარ შვილებთანაც".

ნიკა გვარამიას განცხადებით, "ყველა პატრონიანმა მოსამართლემ შეძლო და დაალაგა კლანთან: მათ ან საქმეები არ ეწერებათ, ან ზემდგომ ინსტანციაში გადაჰყავთ"

"ყველაფერი სწორად მიდის. ბოლოს მაინც ჩვენ ვიმარჯვებთ!," — აღნიშნავს დაპატიმრებული ოპოზიციონერი ლიდერი წერილში.

"სასამართლოში დიდი დავიდარაბაა.

მოსამართლეებმა მასობრივად დაიწყეს პოლიტიკური დაკვეთების გაპროტესტება. ყველა პროცესზე (სისხლისაც და ადმინისტრაციულისაც) დარბაზის შესასვლელ კართან, ოთხკუთხედი შუშის სარკმელში იყურება სუს-ის თანამშრომელი და თვალმოუშორებლად, მთელი პროცესის განმავლობაში მოსამართლის თვალებში აქვს გაყრილი მზერა. აუცილებლად შემჩნეული გექნებათ, იმ სარკმელთან მისვლა და დადგომა რა რთულია. ხშირად, იქ დგომისთვისაც კი დაუკავებიათ. დადგები თუ არა, ეგრევე აგრესიულ მოქმედებებზე გადადიან მანდატურები. ამბავი კი ისაა, რომ ეს სუს-ის ტერიტორიაა.

მოსამართლეები ძალიან შეწუხებულები არიან სოციალური იზოლაციით და მოქალაქეების მხრიდან სამართლიანი გულისწყრომით. მათ ყველგან ცნობენ: სამეზობლოში, მაღაზიაში, ქუჩაში, მოკლედ, ყველგან და მძიმე სიტყვებს ეუბნებიან. ბევრ მათგანს პრობლემები აქვთ საკუთარ შვილებთანაც. ამ პრობლემების გამო მოითხოვეს მათ პროცესების დახურვა, მაგრამ არც ამან უშველათ. ამიტომაც სრულად ჩაერთო ამ საქმეში სუსი: ზოგს პირადი ცხოვრებით, ზოგს კორუფციული ფაქტებით, ზოგს ოჯახის წევრების და სხვა ამგვარი ფაქტებით პრესავენ.
იგივე ამბები დაიწყო მოწმეების მხარესაც, რომლებიც ძირითადად სპეცრაზმელები და პოლიციელები არიან. 20 ივნისის გამოძიების უცაბედი დაწყება არა მხოლოდ და არა იმდენად გახარიას, არამედ მათ მიმართაა სიგნალი — გაგიხსენებთ ძველ დარბევას და დაგიჭერთ თუ სწორად არ მოიქცევით. მოწმეებთან დაკავშირებითაც მოითხოვს სუსი მოსამართლეებისგან, რომ ისინი არ "გატისკონ".

ყველა პატრონიანმა მოსამართლემ შეძლო და დაალაგა კლანთან: მათ ან საქმეები არ ეწერებათ, ან ზემდგომ ინსტანციაში გადაჰყავთ. თავადაც შეატყობდით: არც ერთი ბობოლა მოსამართლე არ იხილავს საქმეს, არც ერთი იმათგან, ვისაც წინა წლებში პოლიტიკური სასჯელი გამოჰქონდა. მათ ნაცვლად ახალი და აქამდე უცნობი მოსამართლეები არიან, თან არაადეკვატურად მცირე რაოდენობით. თითო მოსამართლეს რამდენიმე მრავალეპიზოდიანი და მრავალბრალდებულიანი საქმე აწერია, რაც სრულიად გამორიცხულია საქმეთა ნორმალური განაწილების პირობებში.

უსინდისოების, სინდისის გაღვიძების მე არ მჯერა. მაგრამ, მათი მხრიდან საზოგადოებრივი რისხვის შიშის — ძალიან მჯერა.

ყველაფერი სწორად მიდის.

ბოლოს მაინც ჩვენ ვიმარჯვებთ!
ოლიგარქია უნდა დაემხოს!," — წერს ნიკა გვარამია.

კოალიცია ცვლილებისთვის ლიდერი ლიდერი ნიკა გვარამია ოცნების საგამოძიებო კომისიაზე გამოუცხადებლობისთვის და ამის შემდეგ დაკისრებული გირაოს გადაუხდელობისთვის 2025 წლის 13 ივნისს დააკავეს. ოპოზიციონერ ლიდერს 8-თვიანი პატიმრობა აქვს მისჯილი. ნიკა გვარამია რუსთავის ციხეში საკუთარი ფეხით მივიდა.