ერთიანი ნაციონალური მოძრაობა ბათუმში მიმდინარე პროცესებზე განცხადებას ავრცელებს. პარტია გმობს ძალადობას და ბათუმის ქუჩებში გამოსულებს და ბათუმელებს სიმშვიდისკენ და მართლწესრიგის დაცვისკენ მოუწოდებს.

"მოვუწოდებთ მათ არ აყვნენ პროვოკაციებს, ხელი შეუწყონ ვითარების განმუხტვას და სტაბილურობას. საგანგაშო იყო ხელისუფლების არაადეკვატური რეაქცია სახალხო პროტესტზე. მისი სრული უმოქმედობა – დროულად განემუხტა ვითარება, რასაც პროცესების ძალადობაში გადასვლა მოჰყვა, ხელისუფლებაზე გაბრაზებული მოქალაქეების წინააღმდეგ გამოიყენეს სპეცრაზმი, ცრემლსადენი გაზი, რეზინის ტყვიები, არიან დაშავებულები, მათ შორის პოლიციის მხრიდან".

ენმ შექმნილ ვითარებაში პასუხისმგებლობას ხელისუფლებას აკისრებს. პარტია მიიჩნევს, რომ ქართული ოცნების მმართველობის პირობებში საქართველოში დასუსტდა:

"მოიშალა სახელმწიფო ინსტიტუტები, რომლის პირობებშიც დასაცავია პოლიცია სრული დემორალიზაციისგან".

ერთიანი ნაციონალური მოძრაობა მოუწოდებს ხელისუფლებას, მშვიდობიანად განმუხტოს ბათუმში შექმნილი ვითარება მშვიდობიანად:

"სასწრაფოდ უნდა იქნას გამოძიებული ძალადობის ესკალაციის მიზეზები და გარემოებები. ამასთან, ყველამ ერთად უნდა ვიმსჯელოთ ხელისუფლების პასუხისმგებლობაზე ქვეყანაში ძალადობრივი პროცესების განვითარებაში, რომელსაც არ შეუძლია კრიზისებთან გამკლავება, რომელიც არის ოლიგარქ ივანიშვილის – და არა საქართველოს და მისი მოქალაქეების სამსახურში. შესაბამისად საქართველოს მოქალაქეებში მატულობს უკმაყოფილება და ბრაზი უპასუხისმგებლო ხელისუფლების, ნეპოტიზმის, კორუფციის, განუკითხაობისა და უპერსპექტივობის მიმართ.

ხელისუფლება, რომელიც ვერ უზრუნველყოფს ქვეყანაში სიმშვიდეს და სტაბილურობას, გვართმევს ეკონომიკური განვითარების შესაძლებლობას და სერიოზულ საფრთხეს უქმნის საქართველოს ევროატლანტიკური ინტეგრაციის პერსპექტივას".

როგორ გამოიყურება ბათუმი არეულობის შემდეგ – ფოტოები