გიორგი კვირიკაშვილმა ბათუმში განვითარებულ არეულობასთან დაკავშირებით საგანგებო ბრიფინგი გამართა, სადაც მომხდარში "დესტრუქციული პოლიტიკური ძალები" დაადანაშაულა:

"აღნიშნული მოვლენები ცხადყოფს, რომ ყოფითი შემთხვევა გამოყენებული იქნა დესტრუქციული პოლიტიკური ძალების მხრიდან სიტუაციის ესკალაციისთვის. სამწუხაროდ, აღნიშნული ძალები არ ერიდებიან ქვეყნის სტაბილურობის საძირკვლის შერყევასაც კი. შეგნებულად უკეთებენ პროვოცირებას ვანდალურ აქტებს, ძალადობენ სახელმწიფო სტრუქტურების წარმომადგენლებზე, რომლებიც ჩვენი მითითებით, ამ ეტაპზე, მხოლოდ მინიმალური რეაგირების რეჟიმში იმყოფებიან, რათა მაქსიმალურად ავიცილოთ თავიდან შესაძლო გართულება.

ასევე უნდა ვთქვა, რომ საზოგადოების უდიდესი უმრავლესობის პოზიცია ამგვარი დესტრუქციული ქმედებების მიმართ ცალსახად უარყოფითია. შესაბამისად, სახელმწიფო აუცილებლად უზრუნველყოფს წესრიგის დაცვას და დაიცავს ჩვენი მოქალაქეების უფლებას, იცხოვროს მშვიდ გარემოში.

და ბოლოს, მინდა საგანგებოდ მივმართო ყველას, ვინც მზადაა, ფეხქვეშ გათელოს ჩვენი სახელმწიფოებრიობა და ჩვენი მოქალაქეების უფლებები: ისინი სახელმწიფოსგან უმკაცრეს პასუხს მიიღებენ. მოვუწოდებ ყველას, რომ დაემორჩილოს კანონს და პატივი ვცეთ სახელმწიფო ინსტიტუტებს".

ბათუმის ქუჩებში საპროტესტო აქცია რამდენიმე საათია მიმდინარეობს. აქციის მონაწილეების ნაწილი ბათუმში წვავს პოლიციის ავტომობილებს, საბურავებს, ისვრის ქვებს, პოლიციის შენობის მისამართით.

11 მარტს პატრულმა მოძრაობის შეფერხებისთვის მოქალაქე დააჯარიმა, რასაც სიტყვიერი და ფიზიკური დაპირისპირება, მოგვიანებით კი საპროტესტო აქცია მოჰყვა.