ქართული ოცნების აღმასრულებელი მდივანი, მამუკა მდინარაძე პრემიერმინისტრის, ირაკლი ღარიბაშვილის მიერ დარღვეულ კოვიდრეგულაციებს ამართლებს. მდინარაძის მტკიცებით, ღარიბაშვილი "ღია სივრცეში ქეიფობდა. ქართული ოცნების ერთ-ერთი ლიდერი ირწმუნება, რომ ღია სივრცეში ასეთი ღონისძიებები ეწყობოდა.

"რაც მე ვნახე კადრები, ღია სივრცე იყო. შეიძლება სუბიექტური ვიყო და ჩვენი გუნდისა და ქვეყნის პრემიერმინისტრის გამართლებას ვცდილობდე, მაგრამ უბრალოდ ფაქტებს ვიტყვი, რომ იყო ღია სივრცეში. ასეთი ღონისძიებები ეწყობოდა და ასეთი ღონისძიებების მოწყობის აკრძალვის ინიციატივით გამოვიდა თავად პრემიერმინისტრი და გუშინ საკოორდინაციო საბჭოზე მსგავსი ღონისძიებების აკრძალვისა და შეზღუდვის გადაწყვეტილება მიიღეს", — განაცხადა მდინარაძემ პარტიის ოფისში გამართულ ბრიფინგზე.

რთული ეპიდემიოლოგიური ვითარების ფონზე, 7 აგვისტოს ქვეყნის პრემიერმინისტრმა, ირაკლი ღარიბაშვილმა ხალხმრავალ სუფრაზე იქეიფა. სოციალურ ქსელში გავრცელებულ ვიდეოებში ჩანს, რომ სივრცეში არ იყო დაცული სოციალური დისტანცია, შეკრებილები იყვნენ პირბადის გარეშე და ირღვეოდა სხვა რეკომენდაციებიც. ვიდეო სავარაუდოდ კახეთში, სოფელ არხილოსკალოშია გადაღებული, სადაც ღარიბაშვილი ოლიმპიური ჩემპიონის, ლაშა ბექაურის დახვედრის ცერემონიას დაესწრო.

ქვეყანაში ეპიდემიოლოგიური მდგომარეობა სულ უფრო და უფრო მძიმდება. ინფიცირების ყოველდღიური მაჩვენებელი ბოლო პერიოდში 5 ათასს აჭარბებს. ამ ეტაპზე საქართველოში კორონავირუსის მეოთხე ტალღაა და სწორედ დღეს, ჯანდაცვის მინისტრის მოადგილემ, თამარ გაბუნიამ განაცხადა, რომ პიკის დაღმასვლა ჯერ არ შეინიშნება. ამ ფონზე საკოორდინაციო საბჭო, რომელსაც თავად პრემიერმინისტრი, ირაკლი ღარიბაშვილი ხელმძღვანელობს, მუდმივად მოუწოდებს მოსახლეობას რეკომენდაციების დაცვისკენ, რაც სოციალურ დისტანციას და ხალხმრავალი შეკრებებისგან თავის არიდებას გულისხმობს. უფრო მეტიც, დაავადებათა კონტროლისა და საზოგადოებრივი ჯანმრთელობის ეროვნული ცენტრის დირექტორმა, ამირან გამყრელიძემ განაცხადა, რომ განიხილება დიდი თავშეყრების აკრძალვაც.

აღსანიშნავია ისიც, რომ მაშინ, როცა პრემიერმინისტმა არაერთხელ მოუწოდა მოსახლეობას ვაქცინაციის პროცესში ჩართვისკენ, ის მხოლოდ გუშინ, 8 აგვისტოს, ხალხმრავალ ქეიფში მონაწილეობის შემდეგ აიცრა.

გაიგე მეტი: