ევროპული საქართველო პარტიებისთვის სავალდებულო გენდერულ კვოტებს საკონსტიტუციო სასამართლოში გაასაჩივრებს. სარჩელი სასამართლოში 11 აგვისტოს, 15:00 საათზე, შევა.

სარჩელის ავტორები პარტიის წევრი, ნინო თოდრია და ამომრჩეველი სალომე ხვადაგიანი არიან. სარჩელს ევროპული საქართველოს სახელით თავისუფლების ინსტიტუტი შეიტანს.

როგორც On.ge-ს პარტიაში განუცხადეს, გენდერულ კვოტირებას ქალთა ემანსიპაციის შემაფერხებელ გარემოებად მიიჩნევენ და ეს არის გასაჩივრების მიზეზიც, რადგან თვლიან, რომ გადაწყვეტილება ანტიკონსტიტუციურია.

"კვოტირება არათანასწორ პირობებში გვაყენებს და თავისუფალი კონკურენციის შეზღუდვას გვიწესებს. პარლამენტში დღესაც ყოველი მეოთხე ქალია, მაგრამ ისინი არც ქალების პრობლემებზე საუბრობენ და არც ზოგადად სოციალურ თუ პოლიტიკურ საკითხებზე. ქალების გაძლიერებისთვის მნიშვნელოვანი არ არის რაოდენობა, მნიშვნელოვანია შედეგი, რასაც ისინი გააჟღერებენ. რაც მთავარია, კვოტირება თუ ჭრის პრობლემებს, მაშინ რატომ სხვა უმცირესობებისთვის არ ვაწესებთ? ეს არის ანტიკონსტიტუციური პრინციპი, ყველანაირი თვალსაზრისით და ამიტომ ვასაჩივრებთ", — ამბობს ნინო თორდია On.ge-სთან საუბრისას.

2020 წლის 2 ივლისს პარლამენტმა საარჩევნო კოდექსში ცვლილებები დაამტკიცა, რომელიც გენდერული კვოტირების საკითხსაც მოიცავდა. ცვლილების მიხედვით, პარტიები ვალდებულები არიან, პროპორციულ სიაში ყოველი მე-4 კანდიდატი განსხვავებული სქესის იყოს. მიუხედავად იმისა, რომ კვოტირება პოლიტიკაში ქალთა გაძლიერების მიზეზით მიიღეს, პოლიტიკურ ძალებს შორის ერთიანი პოზიცია არ არსებობდა. კვოტირებას მხარი ქართულმა ოცნებამ, ნაიცონალურმა მოძრაობამ და დამოუკიდებელმა დეპუტატებმა დაუჭირეს. ცვლილებას ეწინააღმდეგებოდნენ ევროპული საქართველოს მაშინდელი წევრები. თუმცა, მოგვიანებით ელენე ხოშტარიამ განაცხადა, რომ მან ნეგატიური დამოკიდებულება გარკვეულწილად შეიცვალა.

პარლამენტის ეს გადაწყვეტილმა პარტია გირჩმა საკონსტიტუციო სასამართლოში გაასაჩივრა. სასამართლომ მათი სარჩელი არ დააკმაყოფილა. თუმცა, ორმა მოსამართლემ — თეიმურაზ ტუღუშმა და ირინე იმერლიშვილმა განსხვავებული აზრი გამოხატა. მათ მიიჩნიეს, რომ სასამართლოს სრულად უნდა დაეკმაყოფილებინა სასარჩელო მოთხოვნა და არაკონსტიტუციურად ეცნო სავალდებულო კვოტირების წესი. მათი შეფასებით, საერთოდ არ შეფასდა, რა გავლენას ახდენს სადავო რეგულირება ხალხის მიერ თავისუფალი არჩევანის რეალიზებაზე.

აღსანიშნავია, რომ კვოტირების წესის მიმღებმა მმართველმა გუნდმა ადგილობრივი თვითმმართველობის არჩევნებისათვის პარტიული სიის შედგენის წესი შეცვალა — საკანონმდებლო ნორმა, რომ 2028 წლამდე ჩასატარებელ თვითმმართველობის ყველა არჩევნებში პარტიულ სიებში ყოველი მეორე ქალი უნდა ყოფილიყო, ყოველი მესამით შეცვალა.