2 000-ზე მეტი ინდოელი სტუდენტი, რომლებიც ქართულ უნივერსიტეტებში სწავლობენ, თუმცა ახლა სამშობლოში იმყოფებიან, ითხოვენ საქართველოში რეგულარული რეისებით ჩამოსვლის საშუალება მიეცეთ. მათ ინდოეთში წასვლა პანდემიით გამოწვეული ვითარების გამო მოუწიათ, ახლა ვერ ბრუნდებიან და ვერ ახერხებენ სწავლის ხარისხიანად გაგრძელებას.

"მოგეხსენებათ, საქართველოს მთავრობის N322 დადგენილებაში 15 აპრილიდან ახალი შეზღუდვები ამოქმედდა, რომლის თანახმად, ინდოეთის რესპუბლიკიდან მომავალ სტუდენტებს საქართველოში შემოსვლა მხოლოდ ჩარტერული რეისებით შეუძლიათ.
ჩარტერული რეისები აპრილის შემდგომ არ დანიშნულა. გარდა ამისა, ჩვენ ინდოეთის სხვადასხვა რეგიონში ვიმყოფებით, ხოლო ინდოეთის ტერიტორიის სიდიდის და არსებული ეპიდემიოლოგიური ვითარების გამო, გამომგზავრება მხოლოდ რომელიმე კონკრეტული ქალაქიდან, ძალიან რთულია [...]

მოგმართავთ თხოვნით, უმოკლეს ვადაში მიიღოთ გადაწყვეტილება და დაგვრთოთ ნება, საქართველოში გამოვემგზავროთ რეგულარული რეისებით, ნაცვლად ჩარტერული რეისებისა", — ვკითხულობთ ინდოელი სტუდენტების განცხადებაში, რომელსაც არასამთავრობო ორგანიზაცია კულტურული მრავალფეროვნება მშვიდობიანი მომავლისთვის ავრცელებს.

ინდოელი სტუდენტები აღნიშნავენ, პრობლემა არა მხოლოდ სწავლების პროცესში სრულფასოვან ჩართულობაშია, არამედ საფრთხე ექმნება მათ სტუდენტის სტატუსსაც.

"ზოგიერთი უნივერსიტეტი, მიუხედავად არსებული მდგომარეობისა, მაინც მოითხოვს ჩვენგან, რომ ფიზიკურად ვიმყოფებოდეთ საქართველოში. წინააღმდეგ შემთხვევაში, საფრთხე ექმნება ჩვენს სტუდენტის სტატუსს. რაც ყველაზე მთავარია, დისტანციურ რეჟიმში ჩვენ ვერ ვახერხებთ სრულფასოვნად ჩავერთოთ აკადემიურ პროცესში და საუნივერსიტეტო ცხოვრებაში, რაც საბოლოოდ, აისახება განათლების ხარისხზეც.

ჩვენ ვართ სრულად ვაქცინირებულნი და საქართველოში ჩამოსვლისას, მზად ვართ დავიცვათ დამატებითი უსაფრთხოების წესებიც", — აცხადებენ ინდოელი სტუდენტები.

მათი მიმართვის ადრესატები არიან პრემიერმინისტრი, ირაკლი ღარიბაშვილი, განათლების მინისტრი, მიხეილ ჩხენკელი, ჯანდაცვის მინისტრი, ეკატერინე ტიკარაძე, NCDC-ს დირექტორი, ამირან გამყრელიძე და სახალხო დამცველი, ნინო ლომჯარია.

ინდოელი სტუდენტების პრობლემაზე საუბრობს ტოლერანტობისა და მრავალფეროვნების ინსტიტუტიც (TDI). ორგანიზაცია საქართველოს მთავრობასა და უწყებათაშორის საბჭოს მოუწოდებს მოიხსნას ინდოელი სტუდენტების საქართველოში დასაბრუნებლად ჩარტერულ რეისთან დაკავშირებული პირობა და მათ მიეცეთ საქართველოში რეგულარული რეისებით ჩამოსვლის საშუალება.