საგარეო საქმეთა სამინისტროში აცხადებენ, რომ საქართველოსა და რუსეთს შორის კეთილმეზობლური ურთიერთობების მომავალი ჩვენი ქვეყნის სუვერენიტეტისა და ტერიტორიული მთლიანობის პატივისცემაზე გადის. ასე ეხმაურება უწყება რუსეთის საგარეო საქმეთა სამინისტროს წარმომადგენლის განცხადებას ქვეყნებს შორის ურთიერთობების აღდგენის შესახებ.

"რუსეთის მხარეს შევახსენებთ, რომ არ არსებობს არანაირი პარალელური რეალობა, საერთაშორისო თანამეგობრობა და საერთაშორისო სამართალი ერთიანია რუსეთის აგრესიული ქმედებების, ოკუპაციისა და დე-ფაქტო ანექსიის პროცესის პირისპირ", — აცხადებენ საგარეო საქმეთა სამინისტროში.

უწყება ხაზს უსვამს ადამიანის უფლებათა ევროპულმა სასამართლოს გადაწყვეტილებას, რომელმაც გაიზიარა საქართველოს პოზიცია და ქართველი სამხედრო ტყვეებისა და სამოქალაქო პირების მიმართ ჩადენილი წამების, არაადამიანური და ღირსების შემლახველი მოპყრობისთვის (კონვენციის მე-3 მუხლი) რუსეთი დაადანაშაულა.

"ამ ფონზე, ცინიკური და სრულიად მიუღებელია სოციალურ მედიაში რუსეთის საგარეო უწყების მიერ გეორგიევსკის ტრაქტატის საიუბილეო თარიღთან დაკავშირებით გამოქვეყნებული კომენტარი, რადგან რუსეთმა, სწორედ ამ შეთანხმების დარღვევით დაიწყო საქართველოს ტერიტორიების ანექსია, სამხრეთ კავკასიაში მიწების მიტაცება და სამწუხაროა რომ საუკუნეების შემდეგაც რუსეთის მიზნად სხვისი ტერიტორიების ანექსია რჩება", — ვკითხულობთ საგარეო საქმეთა სამინისტროს განცხადებაში.

უწყებაში აცხადებენ, რომ რუსეთის საგარეო საქმეთა სამინისტროს წარმომადგნელი, ალექსანდერ ბიკანტოვი "შეეცადა მორიგი დეზინფორმაციისა და პროპაგანდისტული ნარატივის შეთხზვას ე.წ. ახალი რეალობისა და 2008 წლის აგვისტოს ომის შესახებ".


აგვისტოს ომის 13 წლისთავის შესრულებამდე ორი დღით ადრე რუსეთი საქართველოსთან ურთიერთობის აღდგენის მზადყოფნაზე საუბრობს.

"ჩვენ მზად ვართ, გავაუმჯობესოთ ურთიერთობები იმ დონემდე, რამდენისთვისაც მზად არის ქართული მხარე. ვიმედოვნებთ, რომ თბილისში საღი აზრი გაიმარჯვებს", — წერს რუსეთის საგარეო საქმეთა სამინისტროს წარმომადგენელი, ალეკსანდრ ბიკანტოვი.

ამ განცხადებას წინ რუსული პროპაგანდის პოსტი უძღვის, სადაც ისევ ის არის ნათქვამი, რომ, თითქოს, ომი საქართველომ დაიწყო და რუსეთმა სააკაშვილის რეჟიმის აგრესიისგან იხსნა საქართველოს ის ტერიტორიები, რომელიც ახლა თავად აქვს ოკუპირებული.

გაიგე მეტი: