საქსტატის ინფორმაციით, ივლისში წლიური ინფლაცია 11,9% იყო — ეს ბოლო 10 წლის განმავლობაში ფასების ზრდის მაქსიმალური მაჩვენებელია.

წლიურ ინფლაციაზე ყველაზე დიდი გავლენა სურსათის, ტრანსპორტისა და საცხოვრებელთან დაკავშირებულ ხარჯებზე ფასების ზრდამ მოახდინა. ფასები გაზრდილია ჯანდაცვის სექტორშიც, სასტუმროებისა და რესტორნების მომსახურების სფეროშიც და ალკოჰოლურ სასმელებსა და თამბაქოზეც.

ასეთია იმ 10 პროდუქტისა და მომსახურების ჩამონათვალი, რომელიც ივლისში წლიურად ყველაზე მეტად გაძვირდა:

  1. ჭარხალი — გაძვირდა 110,6%-ით;
  2. ბადრიჯანი — გაძვირდა 99,1%-ით;
  3. კომბოსტო — გაძვირდა 98,8%-ით
  4. მზესუმზირის ზეთი — გაძვირდა 91,8%-ით;
  5. კიტრი — გაძვირდა 83,2%-ით;
  6. სტაფილო — გაძვირდა 78,6%-ით;
  7. წიწაკა — გაძვირდა 70,1%-ით;
  8. ბენზინი — გაძვირდა 56,9%-ით;
  9. კარტოფილი — გაძვირდა 54,3%-ით;
  10. ლურსმანი — გაძვირდა 50,5%-ით;

სტატისტიკის მიხედვით, გარდა ამ ჩამონათვალისა, ამავე პერიოდში, გაძვირებულია 253 დასახელების სხვა პროდუქტი და მომსახურება. ამასთან, უნდა აღინიშნოს, რომ ივლისში, გასული წლის იმავე თვესთან შედარებით, გაიაფებულია 32 დასახელების პროდუქტი.

აღსანიშნავია, რომ ივლისში 10 ყველაზე მეტად გაძვირებული პროდუქტიდან 8 სურსათს მიეკუთვნება. როგორც საქსტატის ანგარიშიდან ირკვევა, სურსათისა და უალკოჰოლო სასმელების ჯგუფში ფასები გაიზარდა 14,1%-ით, რაც წლიურ ინფლაციაზე 4,43 პროცენტული პუნქტით აისახა.

შეგახსენებთ, რომ ივნისში წლიური ინფლაციის დონე 9,9% იყო, მაისში — 7,7%, ხოლო აპრილსა და მარტში — 7,2%.

საერთაშორისო სავალუტო ფონდის (IMF) პროგნოზით, საქართველოში 2021 წლის ბოლოს ინფლაციის წლიური მაჩვენებელი 9,4% იქნება, ხოლო მიმდინარე წლის ინფლაციის საშუალო დონე 7,3%-ს მიაღწევს.