საქართველოს პრემიერმინისტრის, ირაკლი ღარიბაშვილის განცხადებით, იპოთეკური სესხით, რომელსაც მთავრობა დაასუბსიდირებს მრავალშვილიანი ოჯახებისთვის, მოქალაქეები შეძლებენ, როგორც ბინის, ისე კერძო სახლის შეძენას. მისი თქმით, პროგრამას დღეს ოფიციალურად დაიწყებენ.

"ნათია თურნავა დღეს წარმოადგენს ახალ პროგრამას, რომელიც ჩვენ რამდენიმე ხნის სწინ დავაანონსეთ, ესაა სუბსიდირებული იპოთეკური სესხის სახელმწიფო პროგრამა მრავალშვილიანი, ან ისეთი ოჯახების საცხოვრებელი პირობების გაუმჯობესებისთვის, რომლებსაც ჰყავთ ახალშეძენილი შვილი ან შვილები. იპოთეკური სესხით შესაძლებელი იქნება როგორც ბინის, ისე კერძო სახლის შეძენა. ეს არის ძალიან კარგი პროგრამა, რომელსაც დღეს ჩვენ ოფიციალურად დავიწყებთ", — თქვა მან.

მთავრობამ 25 ივნისს დააანონსა, რომ ოჯახებისთვის საცხოვრებელი ბინების შეძენის ხელშეწყობის მიზნით ახალ პროგრამას იწყებდნენ. კერძოდ, ღარიბაშვილმა განაცხადა, რომ მრავალშვილიან ოჯახებს, ასევე, ოჯახებს რომელთაც შვილი შეეძინებათ, საშუალება ექნებათ იპოთეკური სესხის სუბსიდირებით ისარგებლონ და ამით საცხოვრებელი პირობები შეიქმნან/გაიუმჯობესონ.