რა არის ოლიმპიურ თამაშებზე ოქროს მედლის მოპოვებაზე უკეთესი? — ოქროს მედლის მოპოვება მეგობართან ერთად. ტოკიოს ოლიმპიურ თამაშებზე სიმაღლეზე ხტომაში მეგობრობამ გაიმარჯვა: ჯანმარკო ტამბერმა იტალიიდან და მუტაზ ესა ბარშიმმა კატარიდან პირველი ადგილის გაყოფა გადაწყვიტეს.

სიმაღლეზე ხტომაში შეჯიბრებისას ორივე სპორტსმენმა ერთნაირი შედეგი — 2,37 მ აჩვენა. ამის შემდეგ, ჩემპიონის გამოსავლენად მათ 2,39 მეტრიანი შედეგის მისაღწევად იბრძოლეს, თუმცა 3-3 მცდელობის შემდეგ, გამარჯვებულის გამოვლენა მაინც ვერ მოხერხდა.

ფოტო: Picture Alliance / DPA / Picture Alliance via Getty Images

წესების მიხედვით, მსაჯმა სპორტსმენებს არჩევანი შესთავაზა — ბრძოლა საუკეთესოს გამოვლენამდე გაეგრძელებინათ ან ოქროს მედალი გაეყოთ. სპორტსმენებს დიდხანს ფიქრი არ დასჭირვებიათ.

"შეიძლება, ოქროს მედალი ორივეს გვქონდეს?" — ჰკითხა ბარშიმმა მსაჯს და ტამბერის ხელი ჩამოართვა.

ბარშიმი და ტამბერი ერთმანეთს პირველად 2010 წელს კანადაში გამართულ შეჯიბრებაზე შეხვდნენ. მეტოქეობა წლების განმავლობაში მეგობრობაში გადაიზარდა, ამიტომ როდესაც მსაჯმა სპორტსმენებს პირველი ადგილის გაყოფა შესთავაზა, სწორი გადაწყვეტილება ნათელი იყო — ჩემპიონობას ორივე იმსახურებდა.

გადაწყვეტილების მიღების შემდეგ სპორტსმენები ერთმანეთს გადაეხვივნენ და გამარჯვება გულშემატკივრებთან ერთად იზეიმეს.