საქართველოს პარლამენტის თავმჯდომარე ირაკლი კობახიძე პრეზიდენტ გიორგი მარგველაშვილის ინიციატივას, შეხვედრის გამართვასა და საზოგადოებისთვის მისი ხედვის გაცნობაზე, პარლამენტის უპატივცემულობად მიიჩნევს.

ხვალ, 10 მარტს საქართველოს პრეზიდენტი გეგმავს შეხვედრის მოწყობას, რათა საზოგადოებას გააცნოს მისი ხედვა კონსტიტუციის საერთო სახალხო განხილვისა და შესაბამისი კამპანიის შესახებ.

პრეზიდენტის პრესსპიკერის თქმით, აღნიშნულ შეხვედრაზე გიორგი მარგველაშვილი იწვევს ადგილობრივი და საერთაშორისო ორგანიზაციების, პოლიტიკური პარტიების,დიპლომატიური კორპუსის წარმომადგენლებს, კონსტიტუციონალისტებს, საკონსტიტუციო კომისიის წევრებს, მედიის და საზოგადოების წარმომადგენლებს.

აღნიშნულ ინიციატივას პარლამენტის თავჯდომარე აკრიტიკებს.

"საქართველოს პრეზიდენტი აღნიშნული ინიციატივით კიდევ ერთხელ უპირისპირდება საქართველოს პარლამენტს და სახელმწიფო საკონსტიტუციო კომისიას და ავლენს შემაშფოთებელ უპატივცემულობას ქვეყნის მთავარი დემოკრატიული კონსტიტუციური ინსტიტუტის მიმართ" - აცხადებს კობახიძე.

მისი თქმით, 10 მარტს, იმ დროს, როდესაც პრეზიდენტმა შეხვედრა დანიშნა, საქართველოს პარლამენტის პლენარული სხდომის დღეა.

"მე და სახელმწიფო საკონსტიტუციო კომისიის 34 წევრი საკანონმდებლო ორგანოს წარმოვადგენთ და 10 მარტს ჩვენი უშუალო უფლებამოსილების განხორციელებით უნდა ვიყოთ დაკავებული. ამით, გიორგი მარგველაშვილმა გამოავლინა ღრმა უპატივცემულობა საქართველოს პარლამენტის მიმართ" - აცხადებს კობახიძე.

ის ასევე ამბობს, რომ კანონმდებლობის თანახმად, კონსტიტუციის გადასინჯვის კანონპროექტის საყოველთაო-სახალხო განხილვის ორგანიზება საქართველოს პარლამენტის ექსკლუზიური უფლებამოსილება და პასუხისმგებლობაა.

"პრეზიდენტს უფლება აქვს მხოლოდ მხარი დაუჭიროს საქართველოს პარლამენტს აღნიშნული განხილვის ორგანიზებაში. აქედან გამომდინარე, გიორგი მარგველაშვილის ინიციატივა, რომელიც საქართველოს პარლამენტთან ყოველგვარი კონსულტაციის გარეშე გაცხადდა, უხეშად ეწინააღმდეგება საქართველოს კანონმდებლობის მოთხოვნებს და უნდა შეფასდეს როგორც საქართველოს პარლამენტის უპატივცემულობის მორიგი გამოვლინება.

როგორც საქართველოს კანონმდებლობის, ისე რაციონალური ლოგიკის თანახმად, კონსტიტუციის გადასინჯვის კანონპროექტის საყოველთაო-სახალხო განხილვა შეიძლება გაიმართოს მხოლოდ მას შემდეგ, რაც მომზადდება და საქართველოს პარლამენტს ინიციატივის წესით წარედგინება კონსტიტუციის გადასინჯვის კანონპროექტი. აქედან გამომდინარე, კანონპროექტზე მუშაობის დასრულებამდე 2 თვით ადრე პრეზიდენტის მიერ აღნიშნული ინიციატივის გაცხადება მოკლებულია რაციონალურ საფუძველს და მხოლოდ სახელმწიფო საკონსტიტუციო კომისიის საქმიანობისთვის დაბრკოლების შექმნას შეიძლება ისახავდეს მიზნად" - აცხადებს პარლამენტის თავჯდომარე.

ირაკლი კობახიძე მოუწოდებს გიორგი მარგველაშვილს, პატივი სცეს კონსტიტუციურ ინსტიტუტებს, არ შეუქმნას ხელოვნური დაბრკოლებები სახელმწიფო საკონსტიტუციო კომისიის საქმიანობას და იმოქმედოს საქართველოს კონსტიტუციისა და კანონმდებლობის დაცვით. პარლამენტის თავჯდომარე მიიჩნევს, რომ პრეზიდენტის ინიციატივა "ვიწრო პოლიტიკური ინტერესებითაა" განპირობებული.