ოსკარის ოთხგზის ნომინანტი რეჟისორი რიდლი სკოტი, როგორც ჩანს, კიდევ აპირებს ამ ჯილდოსთვის შეუპოვრად გაბრძოლებას თავისი ახალი ფილმით The Last Duel (უკანასკნელი დუელი).

ფილმში დუელი გაიმართება ასევე წარსულში ოსკარზე ნომინირებულ მსახიობებს — ადამ დრაივერსა და მეთ დეიმონს შორის. მათთან ერთად მე-14 საუკუნის საფრანგეთში განვითარებული რეალური ისტორიის ეკრანიზაციაში მთავარ როლებს ოსკაროსანი ბენ აფლეკი და ემის მფლობელი ჯოდი კომერი შეასრულებენ.

ფილმის სულ ცოტა ხნის წინ გამოქვეყნებული ტრეილერი ისეთი დამაინტრიგებელი ჩანს, რომ ბევრმა მაყურებელმა ოსკარი მხოლოდ ამიტომაც გაიმეტა უკვე ამ კინოსურათისთვის:

აღსანიშნავია, რომ ადამ დრაივერის მონაწილეობით წელს რიდლი სკოტის მეორე ფილმიც გამოვა: House of Gucci, რომლის სიუჟეტიც ცნობილი მოდის სახლის მმართველი ოჯახის ისტორიის ერთ-ერთი ყველაზე დრამატული, კრიმინალური და ტრაგიკული ეპიზოდის შესახებ მოგვითხრობს.

დიახ, 83 წლის რეჟისორი ერთი წლის განმავლობაში ორ ახალ ფილმს უშვებს ვარსკვლავური შემადგენლობით.

მათგან უკანასკნელი დუელის პრემიერა 15 ოქტომბერს შედგება, გუჩის სახლი კი 24 ნოემბერს გამოვა.