თბილისის მერობის კანდიდატად წარდგენის შემდეგ, ქართული ოცნების გენერალურმა მდივანმა, კახა კალაძემ ტერიტორია ისე დატოვა, რომ ჟურნალისტების კითხვებს არ უპასუხა. პრეზენტაციის შემდეგ ჟურნალისტებთან სასაუბროდ გამოვიდა ქართული ოცნების აღმასრულებელი მდივანი, მამუკა მდინარაძე, თუმცა ღონისძიების მთავარმა გმირმა მედიის კითხვებზე პასუხების გაცემა არ ისურვა.

კალაძის წარდგენაზე მისულ სტუმრებს ჟურნალისტები გარდაცვლილი კოლეგის, ლექსო ლაშქარავას ფოტოებით დახვდნენ. ისინი მიწვეულ მისულ სტუმრებს ეკითხებოდნენ, ხომ არ გრძნობდნენ უხერხულობას იმ პარტიის მხარდამჭერ ღონსიძიებაზე მისვლით, რომლის ლიდერებს ჰქონდათ პასუხისმგებლობა თავიდან აეცილებინათ 5-6 ივლისის ძალადობრივი მოვლენები, თუმცა ეს არ ან ვერ გააკეთეს.

ლექსო ლაშქარავას გარდაცვალების შემდეგ, ჟურნალისტებმა არაერთხელ გააპროტესტეს მომხდარი და ხელისუფლებასაც ბევრჯერ შეახსენეს, რომ მნიშვნელოვანია პოლიტიკური პასუხისმგებლობის აღება 5-6 ივლისის ძალადობრივ მოვლენებზე. მედიის მიერ ორგანიზებულ აქციებზე, ათასობით მოქალაქემ პრემიერმინისტრის, ირაკლი ღარიბაშვილის გადადგომა მოითხოვა. ისინი გარდაცვლილი კოლეგის ფოტოებს შლიან და მოძალადეების დასჯას ითხოვენ მთავრობის ადმინისტრაციაში, პარლამენტში, შინაგან საქმეთა სამინისტროსთან, პროკურატურასთან და ა.შ. ჟურნალისტები პასუხისმგებელ პირებთან მხოლოდ ერთ კითხვას სვამენ — როდის დაისჯებიან არა მხოლოდ მოძალადეებს, არამედ ძალადობრივი კონტრაქციის ორგანიზატორები და წამქეზებლები.

მედიის პროტესტს მმართველმა პარტიამ ბოიკოტით უპასუხა — ქართული ოცნების ლიდერები კრიტიკული მედიის კითხვებს არ პასუხობენ.

მერობის კანდიდატად წარდგენის შემდეგ კალაძემ სიტყვით გამოსვლა ჟურნალისტებისადმი მიმართვით დაიწყო. მან თქვა, რომ 5 ივლისის ჰომოფობიური კონტრაქციის დროს, ჟურნალისტებზე ძალადობა დასჯადი ქმედებაა და სირცხვილია, თუმცა იქვე დაამატა, რომ "არანაკლები ბოროტებაა ფსიქოლოგიური ძალადობა". კალაძე ამტკიცებს, რომ წლების განმავლოაბაში ტელეეთერებიდან ცილისწამებასა და ბულინგს ვისმენთ.