აღმოსავლეთ პარტნიორობის ასოცირებულმა სამეულმა — საქართველომ, უკრაინამ და მოდლოვამ, ერთობლივი მემორანდუმი გააფორმა, რითიც მხარეები თანხმდებიან, როგორი იქნება ნაბიჯები ევროინტეგრაციის საერთო გზაზე. მემორანდუმს ხელი საქართველოს პრეზიდენტმა სალომე ზურაბიშვილმა, უკრაინის პრეზიდენტმა, ვოლოდიმირ ზელენსკიმ და მოლდოვის პრეზიდენტმა, მაია სანდუმ მოაწერეს. ხელმოწერის ცერემონია სიმბოლურად პეტრას ციხეში გაიმართა.

"ევროპულ გზას ჩვენი ქვეყნებისთვის ალტერნატივა არ გააჩნია. ეს არის სუვერენული არჩევანი, რომელზეც მესამე მხარე გავლენას ვერ მოახდენს" — ჩაიწერა დეკლარაციაში, სადაც ასევე წერია, რომ ამ არჩევანს ზურგს უმაგრებს სამი ქვეყნის — საქართველოს, უკრაინის და მოლდოვას, მოსახლეობის სურვილი.

ასოცირებული სამეულის საერთო გზავნილია აღმოსავლეთ პარტნიორობის გაძლიერება და გაერთიანებული ძალისხმევა ევროპული ინტეგრაციისთვის. საქართველოს პრეზიდენტის განცხადებით, დეკლარაციით ასოცირებული სამეული კისრულობს ვალდებულებას, რომ გააძლიერონ და მხარი დაუჭირონ ერთმანეთს.

"ასოცირება არ უნდა იყოს მხოლოდ სიტყვა, მას ახალი მნიშვნელობა უნდა გააჩნდეს, უნდა გაითვალისწინოს ჩვენი სამი ქვეყნის ლიდერთა გონების, საერთო განწყობის და მიდგომების, დემოკრატიული მმართველობის, ძლიერი საზოგადოების მშენებლობის საერთო მიდგომების ნიშანი, რათა განვითარდეს ჩვენი ქვეყნების ეკონომიკა, ერთობლივი პროექტებით და საერთო მიდგომები არსებობდეს კონფლიქტების და ოკუპაციის დასაძლევად.

ახალი მნიშვნელობის მქონე ასოცირება უნდა გაჩნდეს იმდენად, რამდენადაც ჩვენ ვიკისრეთ ვალდებულება, რომ გავაგრძელოთ და გავაძლიეროთ რეფორმები, ადაპტაცია ევროკავშირის კანონდებლობასთან, გავაძლიეროთ ჩვენი სამართლის უზენაესობა და პრინციპები. ასევე ვკისრულობთ ვალდებულებას, ერთმანეთს დავუჭიროთ მხარი, გავაძლიეროთ ერთმანეთი", — განაცხადა სალომე ზურაბიშვილმა.

საქართველოს, უკრაინისა და მოლდოვას პრეზიდენტები შეთანხმდნენ, რომ მათ ევროატლანტიკურ გზაზე საერთო სტრატეგია და ხედვა სჭირდებათ. სამი ქვეყნის ლიდერებს თავიანთი ერთობლივი ხედვებისა და სტრატეგიის დემონსტრაციის საშუალება დეკემბერში, აღმოსავლეთ პარტნიორობის სამიტზე მიეცემათ.

საერთაშორისო კონფერენცია ბათუმში დღეს დაიწყო. გახსნით სესიაზე სიტყვით გამოვიდნენ საქართველოს, მოლდოვას, უკრაინის და ევროპული საბჭოს პრეზიდენტები. მათი მონაწილეობით, ასევე, გაიმართა პრესკონფერენცია.

გაიგე მეტი: