საქართველოს გაეროს ტურიზმის ორგანიზაციის (UNWTO) გენერალურ მდივანი საქართველოს ეწვია. როგორც მთავრობის ადმინისტრაცია იტყობიმენა, შაიხა ნასერ ალ ნუვაისს პრემიერ-მინისტრი ირაკლი კობახიძე შეხვდა.

მთავრობის ადმინისტრაციის ცნობით, შეხვედრაზე საქართველოსა და გაეროს ტურიზმის ორგანიზაციას შორის ურთიერთობების გაღრმავების პერსპექტივები განიხილეს. ხაზი გაესვა წლების განმავლობაში ჩამოყალიბებულ მჭიდრო და ნაყოფიერ თანამშრომლობას.

"პრემიერ-მინისტრმა გამოთქვა იმედი, რომ გენერალური მდივნის ვიზიტი საქართველოში ხელს შეუწყობს პარტნიორობის შემდგომ განვითარებას და ერთობლივი პრიორიტეტების წარმატებით განხორციელებას, რამდენადაც გაეროს ტურიზმის ორგანიზაციას მნიშვნელოვანი როლი აკისრია მსოფლიო მასშტაბით ტურიზმის მდგრადი განვითარების მხარდაჭერაში.

განსაკუთრებული ყურადღება გამახვილდა საქართველოში ტურიზმის სექტორის განვითარების დადებით ტენდენციებზე, საერთაშორისო ვიზიტორების მზარდ დინამიკასა და ტურიზმის მნიშვნელოვან წილზე ქვეყნის ეკონომიკაში.

როგორც გაეროს ტურიზმის ორგანიზაციის გენერალურმა მდივანმა აღნიშნა, საქართველომ მნიშვნელოვან წარმატებას მიაღწია ტურიზმის სფეროში და ეს ციფრებითაც დასტურდება. შაიხა ნასერ ალ ნუვაიმ ხაზი გაუსვა საქართველოს როლს დაკავშირებადობის კუთხით და აღნიშნა, რომ ამ მიმართულებით საქართველო სხვა ქვეყნებისთვის საუკეთესო მაგალითს წარმოადგენს.

ყურადღება დაეთმო გლობალურ ბაზრებზე საქართველოს პოპულარიზაციის მნიშვნელობას. აღინიშნა, რომ აქტიური საერთაშორისო პარტნიორობა ხელს შეუწყობს საქართველოს, როგორც მიმზიდველი და უსაფრთხო ტურისტული მიმართულების პოზიციონირებას მსოფლიო ბაზარზე", — იტყობინება მთავრობა.

შეხვედრას საქართველოს ეკონომიკისა და მდგრადი განვითარების მინისტრი მარიამ ქვრივიშვილი და მთავრობის ადმინისტრაციის უფროსი ლევან ჟორჟოლიანი დაესწრნენ.

აღსანიშნავია, რომ შაიხა ნასერ ალ ნუვაისმა ზურაბ პოლოლიკაშვილი შეცვალა. პოლოლიკაშვილი UNWTO-ს გენმდივნის პოზიციაზე 2018 წლიდან 2025 წლამდე იკავებდა. 2024 წლის ბოლოს ზურაბ პოლოლიკაშვილმა განაცხადა, რომ აპირებდა კენჭი ეყარა მესამე ვადით (2026–2029 წლებისთვის) ამავე პოზიციაზე. თუმცა, 2025 წლის მაისში საქართველოს მთავრობამ მისი კანდიდატურა გაიწვია და მხარი არაბთა გაერთიანებული საამიროების კანდიდატს დაუჭირა. თავად პოლოლიკაშვილის განცხადებით, მმართველი პარტიის მხრიდან მხარდაჭერის შეწყვეტა მის მიერ გუნდში ყოფილი ელჩის, თეა მაისურაძის დასაქმებას უკავშირდებოდა. კარიერის დასრულების შემდეგ, 2026 წლის იანვარში, პოლოლიკაშვილი ტურისტული მენეჯმენტის საერთაშორისო კომპანია HiSEAS-ის მრჩეველთა საბჭოს შეუერთდა.