საქართველოს მე-4 პრეზიდენტი, გიორგი მარგველაშვილი მედიის წარმომადგენლებისა და მათი მხარდამჭერების საპროტესტო აქციას შეუერთდა და განაცხადა, რომ ეს არის ბრძოლა ხელისუფლების ერთადერთი ფუნქციური შტოს ჩამოსაშლელად.

"ეს არის მეთოდური ბრძოლა, რომ განადგურდეს ერთადერთი დარჩენილი სახელმწიფო ინსტიტუტი, ხელისუფლების შტო — მედია ხელისუფლების შტო არის. დანარჩენი ყველა ჩამოშალეს: სასამართლო ჩამოშლილია და ამაზე ყველა ლაპარაკობს; პარლამენტი არალეგიტიმურია, მთავრობა არალეგიტიმურია. ერთადერთი რაც დარჩა არის მედია და მის ჩამოშლას ცდილობენ. ეს პოლიტიკური ბრძოლაა, ეს არ არის გემოვნების ბრძოლა. ეს არის ბრძოლა საქართველოს ერთადერთი ფუნქციური ხელისუფლების შტოს ჩამოსაშლელად", — ასე მიმართა ექსპრეზიდენტმა რუსთაველზე, პარლამენტის წინ შეკრებილ მოქალაქეებს.

მისი თქმით, მოქალაქეებმა ყოველწუთიერად უნდა გავაკეთოთ არჩევანი, როგორ საქართველოში გვინდა ცხოვრება.

"ქართველი იყო ილია ჭავჭავაძეც, მაგრამ ქართველი იყო ბერბიჭაშვილიც; ქართველი იყო ვაჟა-ფშაველა, მაგრამ, ქართველი იყო ბერიაც; ქართველი იყო ივანე ჯავახიშვილი, მაგრამ, ქართველი იყო ორჯონიკიძეც — ჩვენ ეს არჩევანი ყოველწუთიერად უნდა გავაკეთოთ: რომელი საქართველოს მხარეს ვდგავართ ჩვენ [...] ეს არჩევანი გააკეთა ლექსომაც და გახდა მოწამე ამ არჩევანის, შეეწირა ამ არჩევანს. იმისთვის, რომ თქვენთვის, ჩვენთის და ჩვენი შვილებისთვის მიეცა აი ის მომავალი, რომელსაც ემსახურებოდა ილიაც, ვაჟაც და რომელსაც ემსახურებოდნენ ჩვენი დიდი წინაპრები", — განაცხადა მარგველაშვილმა.

მან ტრიბუნიდან მიმართა ახალგაზრდებს და უთხრა, რომ ბრძოლა სამშობლოს დასაცავად ახლა მათ ხელშია.

"ეს ბრძოლა აქ ჩემი თაობისთვის 30 წელიწადია მიმდინარეობს. მე მინდა, რომ გადმოგაბაროთ ამ ბრძლის პათოსი და თქვენ დადგეთ აქ ჩვენი სამშობლოს დასაცავად", — განაცხადა გიორგი მარგველაშვილმა.

17 ივლისს, რუსთაველის გამზირზე მედიის წარმომადგენლების ორგანიზებით მორიგი საპროტესტო აქცია გაიმართა. აქციაზე შეკრებილი მოქალაქეები პრემიერმინისტრის გადადგომას მოითხოვენ. ჟურნალისტების პროტესტი მას შემდეგ დაიწყო 5 ივლისის ძალადობრივ კონტრაქციაზე სასტიკად ნაცემი ოპერატორი, ლექსო ლაშქარავას გარდაიცვალა.