ჯანდაცვის მინისტრი, ეკატერინე ტიკარაძე ვაქცინის სარეგისტრაციო პორტალის, booking.moh.gov.ge-ს შეფერხებით მუშაობას მაღალი მიმართვიანობით ხნის.

"შეფერხებებს სხვა პერიოდში იწვევდა, როგორც ჩვენთვის სხვადასხვა სამსახურებიდან მოწოდებული ინფორმაციით ცნობილი იყო, კიბერთავდასხმები. ამ ჯერზე ეს დაფიქსირებული ხარვეზი გამოწვეული არის მაღალი მომართიანობიდან და დიდი ინტერესებიდან ჩვენი მოქალაქეების ვაქცინაციის პროცესზე და რა თქმა უნდა, არის ძალიან ცუდი, რომ მსგავსი ფაქტი კვლავ დაფიქსირდა და ვერ მოხდა მისი აღმოფხვრა დროულად", — განაცხადა ტიკარაძემ რუსთავი 2-ის ეთერში.

სარეგისტრაციო პორტალის შეფერხების გამო ჯანდაცვის მინისტრმა მოსახლეობას "გულწრფელი ბოდიში" მოუხადა.

დღეს, 14 ივლისის 15:00 საათიდან უნდა დაწყებულიყო Pfizer-ზე რეგისტრაცია, თუმცა უკვე თითქმის ორი საათი გავიდა, პორტალი კი ისევ შეფერხებით მუშაობს.

აღსანიშნავია, რომ დაავადებათა კონტროლისა და საზოგადოებრივი ჯანდაცვის ეროვნული ცენტრის ხელმძღვანელმა, ამირან გამყრელიძემ განაცხადა, რომ IT სამსახურებმა ყველაფერი გააკეთეს, რათა სარეგისტრაციო პორტალის მუშაობა ისევ არ შეფერხებულიყო.

Pfizer-ის 28 000 დოზა საქართველოში გუშინ, გვიან ღამით ჩამოვიდა. ამირან გამყრელიძის ინფორმაციით, Pfizer-თან გაფორმებული ხელშეკრულების მიხედვით ვაქციანა ქვეყანაში ეტაპობრივად, ყოველკვირეულად შემოვა. მისივე თქმით, ოქტომბრის ბოლომდე საქართველოში ჯამში მილიონ-ნახევარი Pfizer-ის ვაქცინის შემოტანა იგეგმება.