პირველი არხის ჟურნალისტის, ირაკლი აბსანძის განცხადებით, დაკავებისას ხელი მოტეხეს. ამის შესახებ მან პირად ფეისბუქგვერდზე დაწერა.

"მეგობრებო, დიდი მადლობა მოკითხვისთვის. კარგად ვარ. ხელი მომტეხეს, უბრალოდ. თან ვეღარ გავიგე, მერამდენე მაიკა უნდა შევწირო ამ ქვეყანას", — წერს ის.

დამატებითი დეტალების გასარკვევად On.ge აბსანძესა და შსს-სთან დაკავშირებას ცდილობს. მათ პასუხს მიღებისთანავე შემოგთავაზებთ.

აბსანძე ქართული ოცნების ოფისთან რამდენიმე სათის წინ დააკავეს. კოალიცია მედიის ადვოკატირებისთვის მის დაკავებას მედიის დაშინების მცდელობად აფასებს.

აბსანძე ბოლო ორი დღეა აქციებში მონაწილეობს, სადაც 5 ივლისს მომხდარ ძალადობასა და ხელისუფლების უმოქმედობას აპროტესტებენ, ასევე, ითხოვენ პრემიერმინისტრტმა ღარიბაშვილმა აიღოს პოლიტიკური პასუხისმგებლობა.

შინაგან საქმეთა სამინისტროს ინფორმაციით, ქართულ ოცნებასთან აქციაზე დღეს ადმინისტრაციული წესით 12 ადამიანი დააკავეს. მათი მტკიცებით, აქციის მონაწილეები შეკრებისა და გამოხატვის თავისუფლების კანონით დასაშვებ ფაქტებს გასცდნენ. სავარაუდოდ, აქ იგულისხმება კვერცხების სროლა ქართული ოცნების მიმართულებით და ასევე, წითელი საღებავების შესხმა პოლიციელებისთვის.

აღსანიშნავია, რომ 5 ივლისის საღამოს, როცა რუსთაველის გამზირზე ძალადობრივი ჯგუფები ფიზიკურად ესხმოდა თავს ჟურნალისტებს და მათ სიცოცხლეს უქმნიდა საფრთხეს, პოლიციამ მხოლოდ 8 ადამიანი დააკავა. სისხლის სამართლებრივი წესით დაკავებების შესახებ მხოლოდ მეორე დილას გავიგეთ, თუმცა ყველა დამნაშავე ჯერ კიდევ არ არის დაკავებული.

ქართული ოცნების ოფისთან დაპირისპირება მას შემდეგ დაიწყო, რაც აქიტივსტებმა "ოცნების" შენობას კვერცხები ესროლეს და სტენსილების გაკეთბა სცადეს. ადგილზე მყოფი On.ge-ს ჟურნალისტების თქმით, პოლიცია მედიასა და აქტივისტებს მიაწვა და ტერიტორია ასე გაათავისუფლა.

პარლამენტიდან ქართული ოცების ოფისთან აქციამ მას შემდეგ გადაინაცვლა, რაც შინაგან საქმეთა სამინისტრომ ბრიფინგი გამართა 5 ივლისს ნაცემი ოპერატორის საქმეზე. უწყება შუალედურ ექსპერტიზაზე დაყრდნობით ამტკიცებს, რომ ლექსო ლაშქარავა შესაძლოა ზედოზირებით გარდაიცვალა.

ამ დროისთვის ქართულ ოცნებასთან აქცია დასრულებულია.